Гадаад хэлээр дуулдаг байж билээ...

UBS TV-ээр Universe Best Songs хэмээх тун давгүй хөөрхөн шоу орой бүр гарах юм. Нэг мэдсэн чинь тэр шоуг үзсээр байгаад дуртай болчихож. Тэр шоунд оролцож байгаа хүмүүс нь яасан ч мундаг дуулдагийн, ямар ч сүрхий гадаад хэлтэйн. Нэг үеэ бодвол Монголчууд маань чөлөөтэй, нээлттэй харьцангуй дэвшилттэй болсон бололтой. Мэдээж үүнд интернэт, олон ТВ, гадны сувгуудын нөлөө ч их биз. Ер нь бол “ардчиллын буян” гэж хэлэхэд ч бараг буруудахгүй биз ээ.

Тэгээд бодлоо л доо. Бага байхдаа бид нар гадаад дууг дуулах гэж ёстой балладаг байж дээ. За яахав Орос соёлын нөлөөгөөр орос дууг бол дуулчихаж байгаа юм. Харин англи болон өөр орны дуу болоод ирэнгүүт нь л ямар ч үгийг нь мэдэхгүй мөртлөө сонсголоороо дуулаал хаяна.

Америк, африкийн дуучдын хамтаран дуулсан нэг дуу байдагдаа. “-We are the World, we are the children” гээл дуулдаг. Тэр дууг “-Би яасын бэ, би яагаачгүй ш дээ” гэж ирээл ичихчгүй дуулаал зогсож байдаг байлаа. Бас тухайн үедээ л их хит болж байсан Modern Talking хамтлагийн нэг дууг яаж дуулдаг байсан гээч “-Ямаа хо, ямаа соо” гээл. Сүүлд эргээд сонссон чинь тэр дууны жинхэнэ үг нь “-you my heart, you my soul” гэж байх жишээтэй. Буруу сонсоно сонсоно гэхэд бас л хэцүү сонсож байгаа биз.

Германы хуучны нэг хамтлагийн Чингис хаан гэж дууг бол бүүр тэр чигээр нь өөрчлөөд сонсголоороо дуулчихаж байгаам. ”- Чингис, Чингис, Чингис хаан хээр очоод, цамцаа тайлаад, зуу татаад, боовоо маажаад” гэж ирээл дуулна. Мэддэг нэг нь нээх сүрхий юм сурчихсан юм шиг мэддэггүй нэгэндээ зааж өгөөл. Эргээд бодохнээ ичмээр ч гэмээр, хөгжилтэй ч гэмээр санагддаг юм. Миний ярьж байгаа энэ бүх үйл явдал бол наяад оны сүүл үе л дээ. Зарим нэг нь сайн мэдэхгүй байж магадгүй л юм..За яахав цааш нь үргэлжлүүлэе.

Италийн Сан Ремо гээл нэх сүрхий фестиваль (концерт ч юм уу) болдог байсныг зарим нэг нь санаж байгаа байх. Ээж, аав л их үзэх дуртай байсан юмдаг. Тэрэн дээр нэг эхнэр нөхөр дуучин дуэтлэж дуулаал. Нөгөө хоёр чинь бие биенлүүгээ аягүй гоёоор харж байгаад “Бээлий шатлаа, чиний миний, том жижиг бээлий шатлаа” гэж ирээл дуулна. Анхандаа гайхдаг байснаа нуух юун. Сүүлд нь аан энэ чинь Итали хэлээр бол шаал өөр утгатай юм байнаа гэдгийг мэдсэн юм даа.

За арай сүүлхэн үеийн жишээ. 90-ээд оны эхээр Монголд “Ламбада” гэдэг нэг дуу тун сүрхий хит боловоо. Том жижиггүй л аяыг нь амандаа аялаал, харин маниусын үеийнхэн бол тэрийг чинь ингэж дуулж байгаам “- ээ Ламбада, Баярсайхан мээмээ унжуулөөд” гэж ирээл нэх сүрхий уянгалуулаад л дуулна даа. Хальт харахад бол нэх сүрхий гадаадаар дуулж байгаа хүн шиг л харагддаг байсан биз. Ер нь л бол иймэрхүү жишээнүүд цаашаагаа үргэлжлүүл үргэлжлэх шинжтэй. Угаасаа миний болон надаас дээхэн үеийнхэн бол сайн мэдэж байгаадаа эд нарыг. Тийм учираас ингэсгээд дуусгая. За тэгээд үг олдож, үхэр мал холдов. Нөхөд түр баяртай.