Борооны дараа нар манддаг

Төгс гэгээрнэ гэж эмэгтэйчүүдийг ойлгохыг хэлнэ

2011-05-18T21:00:00.000-07:00

Сүүлийн үед блогтоо бичлэг нэмэхгүй нэлээд удлаа. Тэгж тэгж хаврын синдром уу юув мэдэхгүй нэг ийм бичлэг бичлээ. Өөр нэг блог дээрээ эртээд нийтлэсэн, энэ удаад энэ блог дээрээ нийтэлчихэе дээ. Би гэдэг хүн их юм үзсэн хүн. Үзсэн харсан гэдэг утгаараа. Гэхдээ энэ эмэгтэйчүүдийг ойлгоод ч байгаам шиг ойлгохгүй ч байгаам шиг аймар хэцүү улсууд юм. Тэгээд өөрийн үзэл бодлоо бичлээ :ь

Эмэгтэйчүүд ба шинжлэх ухаан

Эмэгтэйчүүдийг ойлгох нь шинжлэх ухааны шинэ нээлт хийхээс ч илүү хэцүү юм. Нарийн бичигтэйгээ ойлголцохоос илүү нанатехнологи хөгжүүлсэн нь амар мэт санагдаад, сэтгэлд нийцсэн бүсгүй олно гэдэг шинэ тив нээхээс түвэгтэй санагдаад, гэргийтэйгээ ойлголцоно гэдэг генетик судлалаас хэцүү санагдаад, хайр дурлалын асуудал болохоор харьцангуй онол ч хажууд нь жулдаад. Ёо би гэдэг хүн хэзээ нэг өдөр эмэгтэй хүн судлалаар нобелийн шагнал аваад Стокхольм хотын улаан хивсэн дээгүүр инээд алдан алхаж явах юм болдаа.

Эмэгтэйчүүд ба эдийн засаг

Эдийн засгийн хямралд хямраагүй мөртлөө эмэгтэй хүний үгэнд хямрах юм. Бодлогын хүү хичнээн нэмэгдсэн бондгороороо үлддэг түрийвч минь хардалтын инфляци огцом өсөхөд хавтгайрч жижигрээд миарч байх юм. Хугацаагүй хадгуулсан хайрын хадгаламж минь хувирч өөрчлөгдөөд өр болчих юм. Гэнэтийн ашгийн албан татвар шиг гэнэтхэн надад цохилт өгдөг ээдээ энэ эмэгтэйчүүд эдийн засгаас илүү хүчтэй юм. Санаан зоргоор болдог бол таануудыг санхүүгийн зохицуулах хороонд мэдэгдэмээр, айлгаж надаар тоглодогийг нь бодохоор аудитын газар шалгуулж орхимоор. Татварын тайлан шиг намайг тамлаж байна та нар. Санхүүгийн тайлан шиг намайг салгалуулж байна бүсгүйчүүд.

Эмэгтэйчүүд ба шашин

Буян боддог тархийг минь бусниулж орж ирээд нүцгэн сайхан биеэрээ нүглийн хүслийг бадраагаад. Хайр хэмээх диваажинд хачин ихээр жаргаачихаад, там мэт ганцаардалд тарчлуулж орхидог бүсгүйчүүд. Хайрлаж ойлголцоод ирэхээрээ хайрын тэнгэрийн бүрэлбаа, хаяад яваад өгөхөөрөө хамгийн адгийн чаралбаа. Бүсгүүчүүд та нар бүгдээрээ бурхан чөтгөрийн дундын бүтээл, буян нүглийн хамтын өмч, хайр харууслын эзэд, хамаг амьдралын минь шалтгаан.

Аллах, Будда, Христийн аль аль нь та нараас айдаг. Аргагүйшд тэд нар чинь эрэгтэй хүмүүс. Аягүй бол над шиг л хүмүүс.

2 ном

2011-02-24T01:21:00.000-08:00

Би гэдэг хүн ажил, ажил гэсээр яваад блогтоо сард бараг 1, 2 бичлэг л оруулдаг болсон байх юм. Гэхдээ блог бичих нь багассан ч гэлээ өөр бас бус зүйлсийг бол бичсээр л байна. Тэгээд тэр үр дүнгээсээ товч танилцуулъюу гэж бодсон юм.

Миний бие ажил, амьдарлын зав зайгаараа үзэг цаас холбон суусных ямар ч гэсэн удахгүй хэвлэлтээс ийм 2 ном гарах нь.

Ямаршуу ном болсон талаар эрхэм уншигч нар дүгнэлтээ өгнө биз.

Нэг дэх ном нь бол үл хөдлөх хөрөнгийн харилцааны талаарх бүхий л процесс, эрх зүйн зохицуулалт, нарийн ширийн юмны талаар дэлгэрэнгүй бичсэн B5 хэмжээтэй, 170 хуудастай ном юм. Ерөнхийдөө энэ чиглэлээр суралцагчид, иргэд гээд ямар ч хүн уншихад тохиромжтой байх үүднээс бичсэн.

Хоёр дахь ном нь цэвэр судалгааны ажлын үр дүн юм. Хамтарсан зохиогч нь миний багш байгаа юм. Тэгээд Улаанбаатар хотыг зонинг пермиттэй болгох, тодорхой чи үүрэг бүхий бүсчлэлээр дамжуулан барилга болон газар ашиглалтанд хяналт тавих, удирдах боломжийн талаар судалсан үр дүн юм. Судалгааны хүрээнд нэлээд олон газар судалгаа явуулсан гэхэд болно. Үр дүнг нь одоо нийслэлийн газрын алба, хот төлөвлөлтийн байгууллагууд тодорхой хэмжээгээр үйл ажиллагаандаа ашиглаад эхэлсэн гэхэд болно. Ямартай ч энэ 150 хуудастай В5 хэмжээтэй номны цаана 500 гаруй хуудас судалгааны анкет, 1000 шахуу хуудас анхдагч дата, мөн оронзайн зураглалын файлууд байгаа. Хэрэгтэй хүндээ бол хэрэг болох л ном гэж бодож байгаа. Гэхдээ эхний номыг бодвол нийтэд чиглэгдээгүй юм чинь харьцангуй цөөхөн хувь хэвлэж байгаа.

Анх 2006 онд 2 ном гаргаснаас хойш ном гаргалгүй 5 жил болжээ. За тэгээд номын цагаан буян дэлгэрээсэй гэж өөртөө болон өрөөл олонд хүсэх байна даа.

Идэр есийн жавраар Хөвсгөлийн хязгаарт (Photo post)

2011-01-29T21:10:00.000-08:00

Ажил мэргэжлийн онцлог болоод ч тэрүү би гэдэг хүн хөдөө гадаа их явах юм. Ямар сайндаа дөнгөж шинэ он гаравуу гүй юу хөдөө тийш хүлгийн жолоо залж байхав дээ. Явах явахдаа хамгийн хүйтэн үеэр, хамгийн хүйтэн газар болох Хөвсгөл аймгийн баруун хязгаарлуу явсан юм. Өмнө нь хамгийн халуун цагаар говийн аймгуудаар аялсан бичлэгээ оруулж байсныг санаж байгаа байх.

Энэ удаад Хөвсгөл аймгийн баруун сумдаар аялал хийгээд ирлээ. Аялал маань хүнд хэцүү, хахир хүйтэн цагаар өрнөсөн ч мэдээж залуу халуун хүмүүсийн эрч энергээр сайхан, бүтэмжтэй байлаа. Цасанд суух, шуурга, агаарын температур -40 хэмээс байнга дээш байсан зэрэг саад бэрхшээлийн хажуугаар сониохолтой, хөгжилтэй өрнөсөн энэхүү аялалын зургуудын маань дээжээс тухлан сонирхоно уу.

Хотоос хар үүрээр шахуу гарсан. 1 сарын 2. Хүмүүсийн шинэ жилийн уур амьсгал арилаагүй л байлаа.

Аялалын багийнхан дундаас цаг барилгүй хоцорч бусдыгаа бухимдуулсан нэгнийгээ шийтгэж цасаар угаасаны дараа

Машин дотор буу халан хууч хөөрөлдөөд явахад газрын хол, замын урт үл анзаарагдана

Орхоны гүүрэн дээрх загасны наймаачид. Утсан загас нь бол бараг эндэхийн брэнд болжээ. 1 ширхэг томхондуу загас 10 мянга орчим төгрөгийн үнэтэй.

Цас ороол, замын хальтиргаа гулгаа нэмэгдээл

Хээр хөдөө явахад овоо тойрно гэж нэг сайхан ёс заншил байна. Давхар олон шалтагтай л даа :ь

Хөвсгөлд бас тэмээ байнаа байна

Сумын буудал. Жинхэнэ хайнга газардаа. Дотроо бол амнаас уур гарах энүүхэнд. Савтай ус хөлдөөд хоночихсон байгаа юм. Гэхдээ л хоног төөрүүлэхэд яг цагаа тулахаар үүнээс илүү тухтай газар гэж үгүй шүү дээ.

Хонины хөшөө. Хөвсгөл аймгийн Цагаан-Уул сум аймагтаа малаараа тэргүүлдэг юм билээ. Тэгээд хонины хөшөө бариа биз.

Босоо Шагдар. Нутгийнханы бахархал болсон бөх байсан байгаа юм. Хөшөөг нь шинжвээс ууцны хотойлт, хамрын самсаа, гарын пооз, өгзөгний өнцөг эдр бол айррр :ь

За цасанд суулаа. Ухахаас өөр зам байхгүй. Угаасаа Цагаан-Уулaaс Цэцэрлэг сум хүртэлх зам бол хэсэг яваад л ухахаас өөр аргагүй их цастай юм билээ. Тэр үеэр сум хооронд явсан машин байхгүй. Төвөөс холбоо тасарсан байсан юм. Тэр ар талд байгаа том машиныг харж байна уу. Тэр хүртэл суугаад, эврээд тэндээ хаягдцан байгаа байдал нь. Жолооч нь хотруу сэлбэгэнд явсан гэсэн.

Иридиум гар утас. “- Байна уу!!! Онцгой байдлын газар уу. Бид нар цасанд суучлаа. Нааш нь нисдэг тэрэг явуул ” :ь

Могойн гoлын нүүрсний уурхай. Удахгүй энд цахилгаан станц баригдана гэсэн. Энэ зургийг панорама байдлаар тойруулж авсан байгаа. Томоор үзэхийг хүсвэл дээр нь дарахад л болоо.

Нүүрсний хөшөө гэх юмуу даа. Ямар ч л гэсэн энэн доторх нүүрс нь жинхэнэ байсан. Нэмэлт мэдээ дуулгахад энэ Могойн голын нүүрс маш сайн чанартай, коксжих боломжтой нүүрс юм байналээ шүү.

Элсэн цөл гэж байдаг. Харин битүү цасаар хучигдаад тэнгэр газар нь ялгагдахаа больснийг бол “цасан цөл” гэж нэрлэхэд буруудахгүй биз.

31 ба би гэдэг зураг. Энэ 31 хэмээгч Орос тэрэг болвоос тэр хавийн цасанд суусан машинуудыг татдаг ач буянтай эд байгаа юм. Дээр үеийн тээврийн жолооч шиг гаржуу би :ь

Цантсан цонхон дээр хэн, юуны учир ингэж бичээ вэ? Арай аялалын багаас маань хос төрөх юм биш байгаа :ь

Сүртэй харагдаад байсын. Газрынх нь нэрийг мэдэхгүй нь жаахан тиймэрхүү кк

Эрдэнэт хотын бараа. Нээрээ тэр алсыг харагчийг харж байна уу. Нөгөө УБ хотод байсан алсыг харагч маань ашиглалтын хугацаагаа дуусгасан хэдий ч одоо гавъяаныхаа амралтыг эдлээд Эрдэнэт хотод ажиллаж байгаа бололтой. Бодвол Эрдэнэтийн хүмүүс өндөрөөс унаад яадагчгүй юм байлгүй бүү мэд. Бас паркад байсан агаарын дугуй билүү дээ нэг тоглоом Хөвсгөлд байсан. Ер нь паркын хуучин тоглоомоос төмрийн хаягдалд шилжсэн нь хэд болдоо. (Энэ зургаараа аягүй асуудал дэвшүүлсэн ккк)

Дархан хотын үйлчилгээ. Ихэр могой хэмээх нэртэй нэг хоолны газар орж ирсэн хүмүүс дээр зөөгч нар гүйлдэн ирж өөр өөрийн хоолыг уралдан рекламдаж, менюгаараа эргэн тойрон бүрхэн бүчин авах нь нэг төрлийн үйлчлүүлэгч үнэхээр хаан гэж бодмоор, нөгөө талаар бол бизнесийн өрсөлдөөн шүү дээ гэж бодмоор, бүүр нөгөө талаас нь бодвол бас ядаргаатай юм билээ барьж идчихгээд шаваад байхаар чинь. ккк

За аялалынхаа зах зухаас сонирхуулахад иймэрхүү байлаа. Зарим зурган дээр хувь хүний зураг оруулсан учираас бага зэрэг blur-дсаныг ойлгож байгаа биздээ. Удахгүй дараа дараагийн постуудаараа өөр аялалын өөр гоё гоё зургууд оруулнаа.

Mongolia gains independence from the Qing dynasty

2010-12-28T19:20:00.000-08:00

1911 –12 - 29. Mongolia gains independence from the Qing dynasty. Түүхэнд энэ өдөр бидний өвөг дээдэс Монгол улсын түүхэнд 200 гаруй жил үргэлжилсэн Манж Чин улсын ноёрхлыг эцэс болгож, Үндэсний эрх чөлөөний хувьсгалын ололтыг баталгаажуулан, тусгаар тогтнолоо тунхаглан зарлаж байжээ.

Түүнчлэн энэ өдөр буюу 1911 оны 12-р сарын 29-нд Богд Жавзандамба хутагтыг хаан ширээнд залж, түүнд төрийн тамга, далбаа, өргөмжлөл өгч, таван яам бүхий Засгийн газрыг байгуулах түүхэн явдал тохиож байсан юм байна. Нэг ёсондоо өнөөдөр бол Манжийн дарлалаас гарсан үндэсний эрх чөлөөгөө олсон тусгаар тогтнолын 99 жилийн ойн өдөр юм.

Бас өнөөдөр миний бие энэ дэлхий дээр мэндэлсэний ойн өдөр тохиож буй. Улс орон маань тусгаар тогтносон тун сайхан өдөр төрсөндөө баярлаж, бахархаж байгаагаа нуух юун. За та бүхэнд Тусгаар тогтнолын өдрийн мэнд хүргэе.

Газрын гүнрүү аялсан тэмдэглэл /Photo post/

2010-12-02T23:51:00.000-08:00

Бор-Өндөрийн уулын баяжуулах үйлдвэр нь Монголын жоншны экспортын 97-98, баяжмалын экспортын 100 хувийг дангаараа гаргадаг томоохон үйлдвэр юм. Олборлолт, баяжуулалтаараа дэлхийд айргийн тавд бичигддэг тус уурхай 1985 онд ашиглалтад орсон бөгөөд саяхан тоног төхөөрөмжөө шинэчилжээ. Ингэснээр жоншны баяжмалын чанарын үзүүлэлтийг дэлхийн стандартын түвшинд хүргэж, экспортын зах зээлийг өргөжүүлэх боломж бүрдсэн байна. Өмнө нь Бор-Өндөрийн уурхайн жоншны баяжмал үйлдвэрүүдийнх нь чанарын шаардлагыг хангадаг тул ОХУ руу голлон экспортлогдож, Энэтхэг, АНУ руу бага хэмжээгээр гардаг байсан. Харин баяжуулах үйлдвэрээ шинэчилснээр Япон, БНСУ болон Европын орнуудын зах зээлд бүтээгдэхүүнээ гаргах боломжтой болж байгаа гэнэ.
Миний бие ажлын шаардлагаар Хэнтий аймагт орших Бор өндөрийн жоншний уулын баяжуулах үйлдвэрийн далд уурхайг үзэх завшаан тохиосон юм. Далд уурхайг энгийнээр тайлбарлавал газрын гүнд орших ашигт малтмалыг хонгил үүсгэн ухаж гаргадаг технологи бүхий уурхайг далд уурхай гэж хэлдэг юм байна.
Бидний хэсэг нөхдийн газрын гүн тийш хийсэн аялалыг хөдөлмөрийн баатар Түмэндэмбэрэл гуай газарчлан явсан юм. Тайлбарлагчийн маань хэлсэнээр бид газрын гүнлүү 240 метр гүн орсон гэнэ. Энэ нь 80 давхар байшинтай тэнцэх хэмжээ юм. За ингээд хөдөлмөрийн баатартай мөр зэрэгцэн аялсан аялалын зарим зургуудыг тайлбарын хамт орууллаа.

Аюулгүйн ажиллагааны схем. Яг доошоо буухаас өмнө иймээ тиймээ юм болвол асуудалгүй гэсэн маягийн юман дээр гарын үсэг зуруулаад байсан. Тийм юман дээр гарын үсэг зурчихсан чинь сэтгэлд нэг л эвгүй юм билээ шүү. кк.

Далд уурхайруу орохын өмнө бүх хувцасаа солих ёстой. Арай л турсик солиулахгүй юм билээ. Энэ зурган дээр бид хэд хувцасаа сольж байгаа нь

Нэмэлт хэрэгсэл, хамгаалалтын дуулга, гэрэл, хорт утааны багаа авцгааж байгаа нь. Бас уурхайруу орохоос өмнө бага зэрэг хичээл маягийн юманд суулгаж заавар зөвлөгөө өгсөөн. Ингэж, тэгэж болохгүй, зөвхөн нэг замаар явна. Хорт утааны багаа хэрхэн зүүх, гэрэлний баттерэй хичнээн цаг ажиллах талаар гэх мэт зөвлөгөөнүүдийг өгнө дөө.

За ингээл алхаад эхэллээ дээ

ус туучиж байна. Газрын гүнд болохоор тэр чигтээ усархаг, чийгтэй, тэгсэн мөртлөө аймар их тоостой юм билээ.

Түнэр харанхуй биднийг угтаж байна даа. Жинхэнэ аймшгийн киноны зураг авч баймаар газар

Дээрээс нурж болзошгүй газруудад модон бэхэлгээ хийсэн байдал

Төмрөөр бэхэлгээ хийжээ. Ер нь бэхэлгээ их олон төрөл юм билээ.

Хөрсөн доороо эрдэнээр баян улсууд шүү дээ Монголчууд бид чинь. Бодвол энэ жонш л юм байлгүй.

үнэхээр сонирхолтой юм билээ

За яг жонш харагдаж байна даа

Энэ арай алт биш бээз :P

Хөл доор ус урсаж байна. Аягүй тунгалаг. Гэхдээ ууж болохгүй ээ ккк

Ус урссаар байгаад зам үүсгэсэн байдал

Яг одоо өрөмдлөг явагдаж байна

Миний ойлгосноор ингэж нүх өрөмдөөд энэн дотороо тэсрэх бодис хийгээд дэлбэлж олборлодог юм шиг байгаа юм

Энэ одоо юу ч юм бүү мэд. Ямар ч гэсэн аймар сүртэй. Яг "Хөрөө" гэдэг аймшгийн кинон дээр гардаг шиг юмнууд зөндөө их байсан.

Энэ лифт. Газар доороос ухсан жоншоо энүүгээр гаргадаг байх нь

Газар доогуур явагч машин

Төмөр замаар жонш ачсан жижигхэн жижигхэн воганууд явж байна

Аврах гарц. Энэ их чухал эд. Саяны Чилид болсон шиг юм болуул аврах зориулалттай. Нэлээд хэд харагдсан.

Газар доорх вагонуудад жонш ачигч, бас ухагч юм шиг харагдаад л байна даа

Вагоны суурь

Гарц ч ойртож байна даа

Бараг цаг шахуу аялсан бид хэд. Биднийг ирж авах ёстой лифтийг хүлээгээд сууж байгаа нь

Газар доороос эсэн мэнд, эрүүл саруул гарна гэдэг чинь ялалт биз дээ. Тиймээ шороо тоос, хөлстэйгээ холилдсон ч гэсэн би гарч ирж чадлаа :ь

Тусгай салаа алхана

2010-11-02T19:58:00.000-07:00

Ойрд бичлэг бичсэнгүй. Завгүй байгаа болохоор блогоо тоосонд даруулсаар сар гаруй хугацаа өнгөрчээ. Завгүй хэдий ч оройдоо цэнхэр дэлгэцийнхээ өмнө тухлан сууж “Тусгай салаа” киногоо бол үзчихээд л байгаа юм даа. Гэр бүлээрээ үзэхэд тохиромжтой сайн кино болсон гэж би дүгнээд байгаа. Утга агуулга нь ч тэр, дүрүүд нь ч тэр ер нь л их сайн кино болсон. Зохиолыг нь Амараа ах бичсэн юм билээ.

Хүү маань орой болгон л тусгай салаа үзнэ. Киноны эхэнд явдаг дууг нь явангуут л тоглоомон буугаа бариад дороо тонотогоноод “нэг хоёр” гээл алхаж өгнө. Одоохондоо нэрийг нь сайн хэлж чадахгүй тэгээд “нэг хоёр” гэж нэрлэдэг юм. Бодвол цэргүүд нэг хоёр, нэг хоёр гээд алхаж явааг нь хараад тэгэж нэрлэсэн юм байлгүй. Хүү ч гэлтгүй эхнэр бид 2 орой болохоор байн байн Үндэсний ТВ дээр сувгаа тавиал “Тусгай салаа”-г хүлээж эхлэнэ шүү дээ. Аав, ээжүүд хүртэл бүгд л үздэг сурагтай.

Сая хөдөө ажилаар явж байхад очсон газрын хүмүүс бүгд л тусгай салаа үзнэ. Хаа холын элсэн цөлд хайгуул хийж буй геологич залуус хүртэл хүнд хэцүү ажлын алжаалаа “тусгай салаа” үзэж тайлдаг юм билээ. Мэдээж ДиДишийн антен бас үүнд чухал үүрэгтэй.

Киноны 3 дуу гурвуулаа таалагдсан. Аманд хүртэл аялагдаад.

Амьдралд болж байдаг аар саар жижигхээн зүйлсээс эхлээд цэрэг, цагдаа, хууль эрх зүй, Монгол хүний ёс жудаг, нөхөрлөл, хайр дурлал гээд олон сайхан сэдвийг энэ кино хөндсөнөөрөө хүмүүст нэг талаас ухаарал сургамж, нөгөө талаас мэдлэг мэдээлэл олгож байна гэж би боддог юм.

Хэзээнээс нааш Монголчууд маань сериалд дуртай л даа. “Халтар царайт”-аас өнөөг хүртэл бишгүй олон орны ёсон жорын л цуврал кино үзлээ. Харин одоо өөрсдийн гэсэн сэтгэлд нийцсэн сайхан киногоо үзэж байгаадаа жирийн нэгэн үзэгчийн хувьд сэтгэл хангалуун явдагаа л энэ бичлэгээрээ дамжуулж илэрхийлэх гэсэн юмаа.

Солонгос савангийн дууриудад дарагдаад байсан Монголчууд маань үзэх цуврал кинотой болж, “тусгай салаа”-ныхан ч бас энэ үүргээ нэр төртэй биелүүлж яваа нь сайхан.

“Би“ in Wonderland

2010-09-29T01:18:00.000-07:00

Би яг одоо гайхамшийн оронд байна...

Энд бүх юм өөр юм. Энд нар баруунаас манддаг. Навч цэцэг цементнээс ургадаг. Намар, хавар гэсэн 2-хон улиралтай. Найз нөхөд гэж байхгүй атаат дайснуудтай.

Энд газар хөдлөлт болдоггүй, харин цуурхалаас улбаатай тэнгэр хөдлөлт болдог. Энд хүмүүс хөгшин настай төрөөд, хүүхэд болж залуужаад, сперм болж замхардаг. Зовлон болвол хүмүүс инээдэг, жаргаж байгаа нь энэ гээд уйлдаг. Хүүхдүүд архи ууж, хөлчүүхэн залуус сүүнд донтдог.

Энд ардчилал гэж байхгүй. Харин танилчлал байдаг. Танилийн өмнө төрийн төмөр нүүр тугалга болон хайлдаг, танилийн өмнө өрийн их данс цаас болон хийсдэг.

Энд Ромео Жулетта 2 хайр дурлалаас болж үхээгүй, харин мөнгөнөөс болж үхсэн. Мөнгөгүй Ромеод хэн ч дурлаагүй учираас õàðèéí îðîíëóó явж ажил хйисэн, тэнд очоод Жулеттатай танилцсан ч тэр үйлдвэрлэлийн ослоор амь үрэгдсэн. Ийм учираас Шекспирт нь хүртэл жүжгийн санаа олдоогүй.

Мөрөөдөхөд хүртэл мөнгө төлнө. Мөрөөдлийг худалдаж авдаг. Түрээслэж болно, барьцаалж болно, бэлэглэж болно бас өвлүүлж болно. Ахиухан мөрөөдөл хувьдаа авахын төлөө авлига хүртэл төлдөг.

Энд хүмүүс бурханд залбирдаггүй харин захирал, даргыг шүтдэг. Хар машин, хаймар жийпнээс адис авдаг. Өөрсдийнхөө төлөө өрөөлийг золиослодог. Өрөөлийн төлөө өчүүхэн ч санаа зовдоггүй.

Энд "итгэл" гэдэг үг байдаггүй. Бүгд муу санаатай, атгаг бодолтой. "Сэтгэл" гэдэг үгийг бэлэгдлийн чанартай хэрэглэдэг. Даанч хойч үеийнхэн нь одоо энэ үгийг бараг хэрэглэдэггүй гэсэн.

Энд... энд... энд... Ярих юм даанч их, даанч блогийг цензуртэй бичдэг болсон гэсэн. Тийм болохоор ингээд өндөрлөе. Аягүй бол ад үзэгдэнэ.

Харин би яг одоо гайхамшийн оронд байна...

Мянга сонсохоор нэг үз буюу Оюутолгой (photo post)

2010-09-16T21:31:00.000-07:00

Та бүхэн “Оюутолгой”-н тухай сонин хэвлэл, зурагт, радио гээл хэвлэл мэдээллийн хэрэгслээр зөндөө л үзэж харж, сонсоо байлгүй. Сайнаар ч нэг ярина, муугаар ч нэг ярина. Энэ нь эргээд энгийн ард иргэд бидэнд үнэн мэдээлэл хүрч буй талаар эргэлзээтэй байдлыг үүсгэдэг билээ. Үүнээс үүдэн Оюутолгой төслийг дэмжигчид ч бий, эсэргүүцэгчид ч бий болцгоосон.

Энэ удаагийн фото постоороо би та бүхэнд Оюутолгой ХХК-ны Өмнөговь аймгийн Ханбогд суманд орших кэмп болон тэнд хийгдэж буй судалгаа, өнөөгийн дүр төрх ямар байгааг зүгээр л байгаагаар нь харуулхыг хүслээ. Мянга сонсохоор нэг үз гэдэгдээ.

Хамгийн эхэнд уурхайн үйл ажиллагаатай танилцах гэж буй бид бүхэнд зааварчилгаа болон тухайн газрын талаарх товч мэдээллийг өгсөн юм. Яг л хичээлд сууж байгаа юм шиг санагдсан. Гэхдээ цай кофегоор дайлаад л.

За энэ кэмпийн ерөнхий зохион байгуулалтыг үзүүлж байгаа нь

Заавар, зөвлөгөө өгсөний дараагаар тэндээс тусгайлан гаргасан эйр кондишн бүхий тохилог автобусанд биднийг суулгаад ойр орчмоор яван тайлбарлаж эхэллээ. Яг л сити тур хийж буй жуулчид шиг л явсан.

Ажилчидын байр буюу гэрнүүд

Cпорт талбай, бас бус зүйлсээр ажилчидаа их хангадаг бололтой юм билээ

Удахгүй энэ л талбайд жинхэнэ олборлолт эхлэнэ шүү дээ

Уул уурхайн машин механизмууд ярайтал жагсаал. Сүртэй юм байна лээ шүү.

Өрөмдлөгөөс гарч ирсэн “чөмгөн дээжнүүд”. Эдгээр дээжний тусламжтайгаар нөгөө нөөц энэ тэрээ боддог юм шиг байгаа юм.

Дээжийг томруулж харуулвал иймэрхүү

Цуг явсан оюутнууд маань дээжтэй танилцаж байна

Цуг явсан оюутнууд маань үзүүлэнгийн эрдэс чулуулгуудыг сонирхож буй нь

Тэнд ажиллаж буй нэг геологчийн ажлын ширээ

за их нарийн юм дурандаж байна. Энд алт байна уу гүй юу :P

Тэр жижигхээн шар цэгийг харж байна уу. Энэ чинь л нөгөө алт шүү дээ

Геологчид хийж буй ажлынхаа зургийг ингээд ханан дээрээ наачихсан хоорондоо заагаад ярилцаад сууж байдаг юм билээ

Томруулаад үзвэл жинхэнэ тоо баримт чинь энэн дээр л харагдана шүү дээ

Энийг бараг мэргэжлийн хүн гэлтгүй жирийн хүмүүс ч ойлгочихоор зураг байна лээ. Хөндлөн зүсэлтийн зураг

Яг Оюутолгой дээр авсан зураг. Тэр ногоон толбонуудыг харж байна уу. Тэр чинь нөгөө ОЮУ гэдэг зүйл чинь. 9 эрдэнийн нэгд ордог биздээ.

Энэ газар бол Оюу толгойн овоо бүхий яг гол хэсэг нь л дээ. Бидний зогсож буй яг энэ газраас эхэлж ил уурхай ухах юм гэсэн. Дараа жил энд томоо нүх үүснэ.

Аварга аварга хоолойнууд авчраад тавьчихаж

Энэ бол гүнлүүгээ орж буй хэсэг нь. Далд уурхайн шафт юм уу даа. Яг ийм шафт энд нийтдээ 6 баригдах юм гэсэн. Дэлхийд хоёрхон байдаг гэлүүдээ 1300 метр гүн өрөмддөг өрөм энд л байгаа гэсэндээ.

Заза зарим зургийг тайлбарлах шаардлага алга. Та бүхэн өөрсдөө сая харлаа. Тэгээд ч энэ Оюутолгойн ажил нэгэнт эхэлчихэж. Одоо бүгдээрээ үр дүнг нь хүлээх л үлдлээ.

Үзэсгэлэнт говь нутгаар аялсан тэмдэглэл /Photo post/

2010-08-20T23:45:00.000-07:00

Миний бие 14 хоногийн хугацааатайгаар үзэсгэлэнт говь нутгаар аялаад ирлээ. Энэхүү аялал нь говийн 4 аймаг болох Говь-Сүмбэр, Дорноговь, Өмнөговь, Дундговь аймгуудаар нийт 2000 гаран км зам туулан аялсан бөгөөд аялалын сонин хачиныг фото нийтлэл хэлбэрээр цуврал байдлаар блогтоо оруулахаар шийдлээ. Дараагийн фото нийтлэлүүдээр олны анхаарлын төвд байгаа Таван толгой, Оюу толгойн уурхайгаар аялсан тэмдэглэл, мөн Энергийн төв болох Хамрын хийд, Дэмчогийн хийдүүдийн талаар оруулах болно. За ингээд аялалын зургуудаас үзэцгээе.

Зураг авж буй энэ хүн бол энэхүү блогийг хөтлөгч миний бие юм.

Алс тийш зурайх зам харгуй минь чи намайг ямархан аялалд урин дуудна вэ? Би ямаршуу гайхамшигтай зүйлсийг үзэж, хэнтэй учирахыг гагцхүү зам минь чи л мэдэх бизээ. (романтик эхэлсэн шүү ккк)

Машины цонхоор иймэрхүү дүр зураг харагдаад… аялал цаашаагаа үргэлжилсээр

Шон. Сайншандын ойролцоо авсан зураг. Уг нь тэнгэрийн хаяатай хослуулаад зохиомжтой авах гэж оролдсон юм

Энэ чинь одоо нөгөө голио шүү дээ. Барьж авч байгаад сорвол нуль бидамин гэнэ. Бас харшилд их сайн юм байх. Даанч голио сорох зүрх зоригтой хэн ч байсангүй ээ :P

Сар шувуу. Тал хээрт голдуу тааралдах бөгөөд тал хээрийн мэрэгчдийг устгадагаараа биологийн хувьд өндөр ач холбогдолтой шувуу л даа. Энэ шувуу зургаа авхуулаад сурчихсан шинжтэй байгаа биз дээ.

За одоо л яг жинхэнэ говьруугаа орж ирлээ шүү дээ. Цэнхэр тэнгэр, шаргал элс.

Говийн ганц айл. Яваад орсон чинь ганц эмээ. Айлд орчоод эргээд харсан чинь юу ч байхгүй… гэж мэгээд аймшгийн юм яриад явчууд яана. Ккк. Зүгээр л сайхан айл байлээ.

Агуй. Энд чинь л одоо би бясалгал хийж хэсэгтээ гэгээрлээ шүү дээ. Энд очиж үзсэн хүмүүс хаана, ямар нэртэй газар гэдгийг нь хэлээрэй

Яг урдуур ийм олон хулан давхиж гарвал яахуу. Сэтгэл хөдлөнө гэдэг чинь үгээр хэлэх юм биш. Бид нар ч хөөрсөндөө хулан дагаж давхиж яваад замаасаа хазайж, элсэнд суусан тал бий :D Тэхдээ ан агнуурын талаас нь огт сонирхоогүй болно. Бид нар дунд буутай битгий хэл хутгатай хүн ч бараг байхгүй байсан юм.

Яг нар жаргах агшнаа урдуур гэнэт хулан орж ирээл. Саак биз айн. Бичээд дүрсэлж чадхааргүй л сайхан мэдрэмж.

Чулуужсан мод. Мод чулуужна гэдэг нь агаарын чийглэг муугаас болж модонд ялзрал явагдахгүйгээр эрдэсжиж буй үйл явц юм. Говийн нутгаар бол чулуужсан мод битгий хэл амьтан ч олдож магадгүй шүү :P

Аялалын маршрутын дагуу Зүүнбаянгаас баруун тийш 300 гаруй км явах замд нэлээд хэдэн эртний сүм, хийдийн туурь тааралдсан. Энэ зурган дээр бол “хоньчийн хийд” хэмээх эрт цагийн том хийдийн үлдэгдэл балгасийн хэсгээс харуулж байна. Мөн замд “Өлгийн хийд” гэж хуучин цагт 3000 гаруй лам шавилан суудаг байсан том хийдийн туурин дээр очиж үзсэн. Дараа тусд нь бичлэг болгон оруулнаа.

Цуг явсан оюутанууд маань эртний чулуун зэвсэгийн үеийн эд эдлэл олсон юм. Удахгүй олсон олдворуудаараа сургууль дээрээ үзэсгэлэн гаргаж ч магадгүй.

Говь нутгийн үдшийн гайхамшигт нэгэн агшин

Аялалын багийнханы нэгэн өглөө

Говьд нар ингэж л жаргана шүү дээ. Гоё байгаа биз. Ёстой янзтай харагддаг юм билээ

Дэмчогийн хийд орчимд авсан зураг. Ноён хутагт Данзанравжаагийн барьж байгуулсан маш том хийд бөгөөд одоо энэхүү газар Өмнөговь аймгийн хувьд аялал жуулчлалын том цэг болжээ. Мөн энэхүү газрын энергийн төвд очсон тухай тусдаа фото нийтлэл болгон оруулах болно.

Хармаг жимс. Говьд түгээмэл тааралдах энэ жимс маш гоё амттай. Дарс хийхэд тохиромжтой гэх юм билээ. Азаар тэр дарсыг нь амссангүй. Амсвал бөөн адал явдал болохгүй юу :P

Энэ одоо бурхан залрах гээд байгаа юм шиг санагдаад байхаар нь тэнгэрийн зургийг дарчихсан юм. Яг жинхэнээрээ бол ёстой гоё сүртэй харагдаад байсан юм

Алсад харагдах Хан богд хайрхан. Яг энэ хайрханы ойролцоо нөгөө Оюу толгойн уул уурханй ажил эхлээд байгаа юм. Тусад нь дэлгэрэнгүй зураг хөрөгтэй гоё пост оруулнаа энэ талаар

Энэ хулан гэж ёстой гэнэн цагаан амьтан, санамсаргүй явж байгаад ойрхоноос зургаа авхуулчихсан даа. Гоё.

Говь гурван сайхан уул. Ёстой гоё газар байна лээ. Өмнөговь аймгийн аялал жуулчлалд том нөлөө үзүүлж буй газардаа

За манайхан гурван сайхан ууланд буудаллаж байна. Маргааш өглөө нь биднийг гоё аялал хүлээж байгаа :D

Ёлын ам. Уг нь мөстэй байдаг гэсэн. Биднийг очиход мөс нь хайлсан байсан. Ёстой гоё газар байналээ. Би Ёлын амнаас буцаж яваад хүв хүйтэн усруу унасан шүү кк

Айрр хөөрхөн амьтан. Биднийг ажиглаад хараал байсан

Ёо энэ үед тэнгэр ёстой лайтай харагдаж байсан шүү.

Шөнө орсон бороо, хүчтэй шуурганд олон майхан нурсан байлаа :(

За энэ тэмээний өмнөөс хэлж байгаа юм шүү: Манай говиор ирээрэй. Ёстой сайхан газар. Бас надыг унаж болы шүү нтр :P

Машин түрж, шаварт шигдсэнээрээ аялал улам амттай болдог /Photo post/

2010-07-29T23:33:00.000-07:00

Зуны хамгийн сайхан үйл явдалуудын нэг бол яах аргагүй аялал зугаалга билээ. Тийм ч учираас зуныг аялахгүй өнгөрөөж яаж болохов дээ. Энэ удаад саяхан явсан аялалынхаа талаар хэдэн фото зураг оруулхаар шийдлээ. Аялалын маршрут “УБ-Дархан-Ерөө” гэсэн чиглэлээр үргэлжилсэн бөгөөд буцах зам маань асар их адал явдалтай, төлөвлөгөөнөөс гадуур үргэлжлэх байсныг аялалын эхэнд яахан тааварлах билээ.

Аялалын багийнхан. Зураг авагчийг оролцуулаад 6 хүн. Хувь хүний зургийг блогт нийтэлсэн тул царай төрхийг нь blur-дсаныг ойлгоно биздээ.

Дархан хотын шөнийн үзэмж. Ойрын үед Дархан яваагүй миний хувьд гүүр орчмын газар үнэхээр таалагдсан шүү. Дархан хотын үзэмж улам л сайн болсон байна лээ.

Сэлэнгэ аймаг. Ерөө сумын төв.

Алсад цэнхэрлэн харагдах уулс. 1-р сувгаараа шүү :P

Сэлэнгэ аймаг манай улсын газар тариалангийн том бүс нутаг. Тиймдээ ч энд тракторын хөшөө байгаа байлгүй. Атрын эзэмших аяны л трактор байхдаа бодвол…

Байгаль үнэхээр сайхантай газар байна лээ. Миний ар талд байгаа байгалийг хардаа үнэхээр сайхан байгаа биз.

Бас нэгэн байгалийн зураглал. Энгийн хэрнээ сайхан.

Цаахан талд байгаа талбайд тариалалт хийгээгүйг бодоход уриншилсан бололтой.

Тогоруу. Хосоороо амьдардаг амьтан бололтой юм.

Тариа алтран шаргалтах арай л болоогүй байгааг энэ зургаас харж байгаа бизээ.

Ер нь бодоод байсан чинь аялалын явцад машин намагт шигдэх, голын дунд янданд нь ус орж зогсохоос эхлээд л саад бэрхшээлтэй байх тусмаа амттай юм шигээ. Шаварт суусан машиныг түрж гаргах ч бас нэг төрлийн кайф юм билээ шүү :P

За могой гэдэг чинь энэ шүү дээ. Нумараал. үсрэхгээд байгаа ч юм шиг. Ямартай ч бяцхан анаконда маань бидэнд муу зүйл хийгээгүй ээ.

Ерөө гол. Загасчдын диваажин гэх юм билээ. Даанч биднийг очих үед үерлээд загас баригдахааргүй л байх шиг байна лээ.

Аялалын баг. Гал тойрч суугаал юм юм яриал. Энэ чинь л сайхан шүү дээ.

Галын дөл өөдөө гээл хараад зогссон доо :P

Адал явдалын тухай бичнэ гэвэл урт түүх болох байхаа ккк.
Жич: Хэрэв зургуудыг томоор үзэхийг хүсвэл дээр нь ганц дарахад томоор харагдана шүү :)

Амьдрал бол ТРЮМАН ШОУ

2010-06-28T00:08:00.000-07:00

Хайртай эхнэр нь хүртэл жүжигчин. Багын найз нь хүртэл түүнтэй нөхөрлөснийхөө төлөө цалин авна. Ажлын газрынх нь хүмүүс, ар гэрийнхэн нь хүртэл жүжигчид. Идэж ууж, эдэлж хэрэглэдэг бүх зүйлс нь реклам. Найруулагч нэртэй бурхан түүний амьдралыг өөрийн зурсан зургаар төвөггүйхэн өрнүүлнэ. Хувь заяа, амьдрал нь тэр чигээрээ зохиол.

Харамсалтай нь Трюмэн энэ бүгдийг даанч мэдэхгүй. Мэдэхгүйгээр ч үл барам тэр мөрөөднө, тэмүүлнэ, юунд ч юм итгэнэ.

Тиймээ энэ бол найруулагч Peter Weir –ийн ээлжит нэгэн бүтээл болох 1998 онд нээлтээ хийсэн The Truman Show хэмээх кино юм. Киноны үйл явдал нь Трюмэн хэмээх жирийн нэгэн залуугийн жирийн бус амьдралын тухай өгүүлнэ.

Эхийн хэвлийд байхдаа л тэр шоуны гол дүрээр сонгогджээ. Харин Трюманд өөрт нь сонголт байсангүй. Түүний уйлах, инээх, өсч торних бүхий үйл явцаас эхлээд анхны үнсэлт, анхны болзоо, амьдралын гунигт болон баярт мөчүүд үзэгчдийн нүдэн дээр өрнөнө. Гагцхүү Трюман л өөрөө энэ бүгдийг үл мэднэ.

Мөнгөнд шунасан хүмүүс Трюманыг шилэн хоргоны цаадах үзмэр, хүмүүсийг инээлгэдэг алиа салбадай болгожээ.

Хэдийгээр тэр салбадай ч бай, үзмэр ч бай ямар ч л гэсэн шоуны үзэгчид Трюманд хайртай. Гэхдээ хайрлаж байгаа нь энэ гээд хашаа торонд хорьчихдог амьтаны хүрээлэнгийн өрөвдөлт амьтан шиг байлгах уу, аль эсвэл хатуу харгис ч гэсэн бодит ертөнцөд нь хүн ёсоор амьдруулах уу? Сонголт байгаа. Эцсийн дүнд Трюман гайхамшигтай бөгөөд зөв сонголт хийснээр кино дуусна.

Киноны үндсэн үзэл санаа “хуйвалдааны онол” дээр тулгуурласан бололтой. Трюманыг хүүхэд ахуй үед нь багш нар нь хэрхэн тархийг нь угаасан, мөн Трюманд зохиомол айдас үүсгэж, сэтгэлд нь хоногшуулж байгааг харуулсан киноны хэсгүүд нь манай оронд хэдэн арван жилийн өмнө тогтож байсан соци нийгмийн арга барилыг санагдуулна. Тухайн үед соци нийгэмдээ нийцүүлэн зохиомлоор гуйвуулсан түүхийг дунд сургуулийн хичээл дээр заадаг байсан, хөрөнгөтнийг үзэн ядах сэтгэхүйг хэрхэн төлөвшүүлдэг байсан , цөмийн дайны айдас бүхий хүйтэн дайны үе зэрэг тархи угаалтын улбаа одоо хэр бидний сэтгэхүйгээс гүйцэд арилаагүй л байна.

Нөгөө талаар Трюманы амьдарч буй (түүний хувьд хорвоо ертөнц гэж боддог) маш том студи байна л даа. Хэлбэр дүрс нь хүртэл “хөмөрсөн тогоо” мэт энэ студи дотор гадаад ертөнцөөс таслагдсан зохиомол хиймэл нийгэм оршин тогтноно. Хиймэл ертөнц үүсгэсэний гол шалтгаан нь жинхэнэ амьдрал, бодит үнэнээс айсаных. Яг ийм байдлаар хүн амаа гадаад ертөнцөөс салгачихсан Хойд Солонгос, Куба гэх мэтийн улс орнууд өдгөө ч дэлхий дээр оршин буй. Тэдгээр орнуудад ТВ-ийн олон суваг, интернэт гэж мэдэх ч үгүй сая сая Трюманууд “-болж байна, бүтэж байна” гэсэн бодол өвөртлөн амьдарсаар. Яг л Трюман шиг хэн нэгний ашиг сонирхлын золиос болон амьдарсаар.

Бид ч бас магадгүй улс төрчид, эрх мэдэлтэнүүд, бизнесийн бүлэглэлүүдийн хувьд Трюман ч юм билүү. Хэн мэдлээ. Магадгүй бид тархиа дэндүү сайн угаалгачихсан учираас энэ талаар бодож, тунгааж чаддагүй ч юм билүү.

Энэ бичлэгтэй холбоотой бичлэгүүд:

Хуйвалдааны онолоор синдромдохуй

Сүйрлийн онол буюу шилдэгүүдийн шалгарал

Баялаг болгон өмч болохгүй - 3: Монголд эхэлсэн капитализм

ХҮМҮҮС...

2010-05-24T22:30:00.000-07:00

Эргэн тойрон бужигнах хүмүүс. Инээсэн, уурласан, эсвэл зүв зүгээр тайван амгалан төрхтэй хүмүүс. Гунигтай, жаргалтай, хөгжилтэй, хүйтэн, дур булаам харцнууд. Өндөр нам, өргөн бүдүүн есон жорын хэмжээсүүд. Дахин давтагдахгүй 6 тэрбум араншин, дахиж давтагдахгүй 6 тэрбум амьдрал. Хаа сайгүй хүмүүс.

Хүмүүс цаг хугацааг үргэлжлүүлж байна. Хүмүүс өнөөдрийг бүтээж, маргаашыг төлөвлөж, өчигдөрийг муулж байна.

Хүмүүс орон зайг туулж байна. Хүмүүс холыг ойртуулж, ойрыг холдуулахуйц техник, технологиор зэвсэглэн оронзайг элээж байна.

Хүмүүс судалж байна. Хүмүүс өчүүхэн жижиг нано хэмжээсээс эхлэн өргөн уудам галактикийг ч хүртэл судалж байна.

Хүмүүс бүтээж байна. Хүмүүс хот суурингуудыг, эрх чөлөөг, эдийн засгийг, эрх мэдлийг, зэр зэвсэгийг бүтээж байна.

Хүмүүс сөнөөж байна. Хүмүүс өчигдөрийг түүхтэй нь цуг, өнөөдрийг байгальтай нь цуг, ирээдүйг хүн чанартай нь цуг сөнөөж байна.

Хүмүүст одоо "АМРАЛТ" хэрэгтэй.

Бэтмэний шаналал, Жокерийн философи, Харвей Дентийн эмгэнэл

2010-05-06T01:42:00.000-07:00

Та бүхэний сайн мэдэх нэг киноны дүрүүдийн талаарх өөрийн үзэл бодолоо хуваалцахаар шийдлээ. Тиймээ энэ кино бол найруулагч Кристофер Ноланы бүтээсэн Warner Bros. киностудийн бүтээл “Dark Knight” кино юм. Гарсан даруйдаа кино ертөнцөд шуугиан тарьж АНУ, Канадын кинопрокатад шууд 11 рекорд тогтоож байсан гайхамшигтай бүтээл. Гэхдээ энэ удаад киноны тухай ярихыг хүссэнгүй. Харин тэрхүү киног жинхэнэ мөнх настай бүтээл болгож чадсан дүрүүдийнх нь өөр өөрсдийн онцлогийн талаарх үзэгчийн байр сууриа илэрхийлэхийг хүслээ.

Бэтмэний шаналал
Гол дүр тэрбумтан Брюс Вэйн буюу Бэтмэн. Бэтмэн бол төгс төгөлдөрийг эрхэмлэгч бөгөөд шударга, аюулгүй, амгалан тайван, элбэг хангалуун нийгмийг хүсэмжлэгч нэгэн. Даанч хорвоо дэлхий хэзээ ч Бэтмэний хүссэн шиг биш болохоор түүний энэхүү оптимист мөрөөдөл “бодит амьдралын хана”-ыг мөргөн унана. Хүн л болсон хойно Бэтмэнийг дурлал хайр тойрч гарсангүй. Даанч хайртай болсон бүсгүй нь түүний сайн найзынх нь сүйт бүсгүй. Иймэрхүү дотоод сэтгэлийн зөрчилдөөнт байдлууд нь түүнийг сэтгэлийн шаналалд унагах бөгөөд Бэтмэн өөрийгөө өнөөх шударга бус бохир нийгмийн нэг хэсэг болгосон мэт. Гэвч тэр үүнийгээ хэзээ ч хүлээн зөвшөөрдөггүй. Хүлээн зөвшөөрнө гэдэг нь түүний хувьд жинхэнэ ялагдал. Тиймдээ ч Бэтмэний дайсан бол төрөл бүрийн гэмт хэрэгтнүүд биш. Тэр байтугай Жокер ч түүний жинхэнэ дайсан биш. Харин түүний жинхэнэ бөгөөд хамгийн хэцүү дайсан бол тэр өөрөө.
Бодит байдал, хүсэл мөрөөдөл 2-ийн зааг дээр шаналан буй эгэл хүн болох Брюс Вэйний зовлонг баг зүүсэн супер баатрын дүр нь л бага ч болов нимгэлэх аж. Бэтмэн дотоод ертөнцдөө ч тэр, гадаад ертөнцөд ч тэр тэмцэл дунд амьдарсаар. Тэмцэлдэх тусам тэр өөрөө хурцлагдсаар.
Жокерийн философи
Шатаж буй овоолсон мөнгө, түүний хажууд бахдалтай нь аргагүй зогсох нүүрээ будсан гаж залуу. Тиймээ энэхэн хэсэг агшинаас та Жокерийн үзэл санааг бага ч болов гадарлаж эхэлнэ. Түүний амьдралын утга учир юу вэ? Алдар хүнд, мөнгө төгрөг, хайр дурлал биш. Гэр бүл бол бүүр ч биш. Яагаад гэвэл Жокер хүмүүсийг муу муухай, бузар булай гэдгийг мэднэ. Харин үүнийгээ нотлох нь Жокерийн амьдралын утга учир.
Жокерт хүмүүсийн амьдрал яг жүжиг шиг л санагдана. Бэтмэн сарьсан багваахайн багний цаана өөрийгөө нуудаг бол жирийн хүмүүс бүгд “нийгмийн төлөвшил” гэдэг айхтар багнийхаа цаана өөрсдийгөө нуун “амьдрал” хэмээх жүжигт дор бүрнээ дүр бүтээнэ. Үнэндээ бол хүмүүс муу муухай бүхний жинхэнэ эзэд. Тэдэнд араатаны ховдог хомхой зан, аймшигт бодолууд бий. Энэ байдалыг ил гаргах нь Жокерийн хүсэл мөрөөдөл. Харин яагаад Жокер ийм үзэл бодолтой болж төвөлшсөнийг хэн ч үл мэднэ. Магадгүй түүний туулж өнгөрүүлсэн амьдрал нь Жокерийг ийм болгосон ч юм билүү. Хэн мэдлээ. Мэдэхгүй чигээрээ тааварлаад явж байх нь илүү гоё ч юм шиг. Жокерийн амьдралыг үзэх песимист үзэл санаа, Бэтмэний оптимист хүсэл мөрөөдөлтэй перпикуляр байдлаар огтлолцсон нь тэр 2-ийг дайсан болгох гол шалтгаан болно.
Харвей Дентийн эмгэнэл
Харвей бол үнэхээр баатар. Түүнд Бэтмэнийх шиг сэтгэлийн шаналал, Жокерийнх шиг адын хүсэл байхгүй. Тэр үнэхээр жишиг хүн. Магадгүй Бэтмэний мөрөөдлийн ертөнцөд л Харвей шиг хүмүүс олноороо байдаг байх. Гэвч түүний төгс төгөлдөр байдал Жокерийг галзууруулах шахна. Жокерт Харвейг алах боломж зөндөө байсан. Харин “баатрыг алж болно, ялж болдоггүй юм” гэдгийг Жокер мэдэхийн дээдээр мэднэ. Тиймээс хүмүүсийн бахархал, сайн сайхан бүхний итгэл найдвар болсон Харвейг эргээж хүмүүсийнх нь эсрэг хөдөлгөх заналт дайсан болгох ёстой. Харамсалтай нь Харвей маань Жокерийн төлөвлөгөө ёсоор хувирч бид бүгдийн мэдэх “Хоёр нүүрт (Two face)” болно. Жокер ялжээ. Сайн хүн хүртэл муу муухай болдогийн жишээг Харвейгээр баталж чадлаа.
2 нүүрт болж хувирсан Харвей Дент царай төрхөөрөө ч тэр, зоос шидэн сонголт хийдэг зуршилаараа ч тэр хүн төрлөхтөний мөнхийн сэдэв болох DILEMMA -г илэрхийлэх ажээ. Сонголт бүгдэд байгаа. Харин хаашаа вэ гэдэг нь гагцхүү таниас шалтгаална. Харвейгийн дүр гашуун бөгөөд эмгэнэлтэй хувь заяаг, хүсэл мөрөөдөл сайн сайхан яаж хормын дотор унтардагийг, сонголт ямар хувь заяа авчирдагийг харуулсаар...
“Dark Knight” киноны дүрүүдийн талаарх үзэгчийн буюу хувь хүний үзэл бодол нэг иймэрхүү. Та бүхэнд ч бас энэ киноны талаарх үзэл бодлын хувилбарууд байгаа бизээ. Тиймээс үзэл бодлоо хуваалцана гэж найдаж байна. Киноны тухай илүү ихийг уншъя гэвэл манай movie addict –уудын блог movieclub.gblog.mn –ээр зочилоорой. Би бас энэ блогийннэг админ нь байгаа юм.
За тэгээд захихад манай мүүвийклаб блогийг эргэж тойрч байгаарай. Энд гоё гоё юм бичдэг, нийтэлдэг админууд зөндөө их байдаг юм билээ :D Кино сонирхогч эрхэм танд манай блог таалагдах нь лавтай.

Муу хүмүүс...

2010-04-18T21:53:00.000-07:00

Оптимист үүднээс бол "муу хүмүүс" бол зүгээр л зүлгүүр. Тэд чиний мууг үзэх гэж мэрийх тусам чи зүлгэгдэж улам бүр өнгө орж гялалзана. Энэ бүхний эцэст чи гялалзаж, харин зүлгүүр өөрөө элэгдсэн байдаг...

Харин чи өөрийгөө "сайн хүн" гэж боддог "муу хүн" юм биш биз? Тэгвэл ч асуудал эсрэгээрээ шүү дээ. Мэдээж хэн гялалзаж, хэн элэгдэх нь тодорхой.

Good luck :-)

Тог тасрахад ямар сайхан байсан гээч...

2010-04-14T20:16:00.000-07:00

Хэзээ ч билээ бүү мэд, аль ч юм нэг оронд явуулсан судалгаа юм гэсэн. Тэр судалгаагаар хүн төрлөхтөний зохиосон хамгийн хэрэгтэй ололтууд гэсэн чинь 1-рт гар утас, 2-рт вакцин, 3-рт интернэт 4-рт цахилгаан энерги гэх мэтээр үргэлжилж байна. Харин хүн төрлөхтөний бүтээсэн хамгийн том алдаанууд гэсэн чинь дахиад 1-рт гар утас, 2-рт интернэт, 3-рт цөмийн бөмбөг гээд явж байвал яахав.

Нээрээ л бодоод байсан чинь бид нар бүтээсэн зүйлийнхээ боол нь болчихсон гар утаснаасаа үхэр шиг дөрлүүлчихсэн, интернэтгүй бол агааргүйтэй адил шахуу болчихоод сууж байдаг. Бидний бодож сэтгэх, хийх бүх үйлдэлийг тэд нар бараг гүйцэтгэчихдэг болохоор ирээдүйд хүмүүс нэг бол зомби шиг эсвэл Wall E хүүхэлдэйн дээр гардаг шиг махан бөмбөгнүүд болох биз. Мэдээллийн хэрэгслүүдийн тусламжтайгаар тархиа хангалттай угаалгана, тэдний цахилгаан соронзон долгионд тархи, мэдрэл, гени, эрүүл мэндээ хордуулна, амьдралынхаа алт шиг цагийг зурагт, радио, интернэтээр үрнэ. Энэ бүхний үр дагаврууд нь аймшигтай. Хөгжих тусам хүний мөсөө хайлаад л, хүмүүсийн хоорондын харилцаа хиймэл болоод л. Яваандаа матрикс кинон дээр гардаг шиг усан дотор хэвтчихээд тоон ертөнц дотор амьдараад явж байх ч юм билүү. Балай юм. Нано технологи л гэнэ. Сайнаар ашиглавал сайхан л эд бололтой юм. Муугаар ашиглавал яах бол ганц хормын дотор л дэлхийг сүйрүүлнэ биз.

Дээрээс нь техник технологийн хөгжил дэвшил байгаль орчинтойгоо урвуу пропорциональ зүй тогтолтой. Дэлхийн дулаарал бол дэлхийн жинхэнэ сүйрэл. Юун 2012 он.

Дээр нэг удаа тог тасардаг юм байна. Ямар сайхан байсан гээч. Юун зурагт, юун интернэт. Хүүгээ дундаа хэвтүүлчээд эхнэртэйгээ юм юм яриал. Анх тэгж ярилцаж байгаад л бие биедээ хайртай болсон байх. Яг тэрүүн шиг. Төрөл бүрийн цахилгаан хэрэгслийн дуу чимээ, гэрэл гялбаа юу ч байхгүй. Зөвхөн эхнэр хүү бид 3 бас лааны гэрэл. Магадгүй тог цахилгаан, интернэт, кабелийн сувгууд бид бүгдийн харилцаа холбоо хөндийрөх нэг шалтгаан болдог байх.

Өдөр тутмын ажил зав чөлөөгүй өрнөж, мөнгө, эрх мэдлийн төлөө зэрлэг араатан мэт хоорондоо тэмцэлдэх их хотын амьдрал дунд яруу найрагч Ц.Хулангийн нэгэнтээ шүлэглэсэн "-Зүлгэн дээр гэрээ бариад зүгээр л нэг амьдармаар" санагдах мөчүүд хаяа хаяа тохиолддогийг нуух юун. Амьдрал ганц олдох болохоор амьдарсан шиг л амьдармаар байх юм даа уг нь.

Өнөөдөр Монгол хүн сансарт нисээгүй бол :D

2010-03-21T22:55:00.000-07:00

1981 он. Гүрээ ах маань “сансрын нисэгч ах” болоод саран наран 2-той саатан уулзахаар Бек ахыг дагаад явжээ. Монгол түмний нар гарч энгийн эгэл ардын хүү сансарт хүртэл нисэж болдогийг харуулсан соци түүхийн гайхамшигт оргил үе. Энэ үед Монголчууд маань бөөн баяр хөөр болсон гэжуга. Яагаав биднүүд сая 2008 онд анхны Олимпын алтан медаль авахад яаж баярлалаа тэрүүн шиг юм болсон гэжуга. Тэхдээ тухайн үеийн төрийн тэргүүнүүд нь олон түмний нүдэн дээр согтуу гарч ирээгүйм билээ шүү .ккк

Яг энэ баярын үеийг далимдуулаад аав маань (их сэргэлэн хүн гэдгийг нь хэллүү) ээжид хайрын захиа өгчээ. Мэдээж энэ их баяр баясгалант үетэй давхацуулна гэдэг нь аавын эр хүний 13 мэхний нэг байж л даа. Ээж яахуу баярлаж хөөрсөн хүн чинь захиа аваад, хүн сансарт нисээд ёстой нээрээ нөгөө балжинням, дашням давхацна гэдэг шиг юм болохгүй юу. Тэгээд зөвшөөрчихсөн байх юм. ккк. За үүнээс хойш хэдэн сар өнгөрөв үү гүй юу манай 2 тэр жилийнхээ 11 сард хуримаа хийж, гэрлэлтээ батлуулжээ. Үүнээс хойш бүтэн нэг жил өнгөрсөний дараа нэгэн хөвүүн мэндлэв. Түүний баруун гарт шагайн чинээ нөж байгаагүй л дээ. Кк. Гэхдээ тэр хүн нь өнөөдөр энэ блогийг хөтлөөд явж та бүхний эчнээ танил (заримынх хуучны танил) Бороо миний бие бөлгөө. За тэгээд аав, ээж 2 минь үүнээс хойш 3 хүүхдийн аав ээж болж аз жаргалтай амар сайхандаа жаргасандаа.

Өнөөдөр аав ээж 2-ийн хайраа илчилсэн өдрийн 29 жилийн ой. Манай 2 яахав уламжлалаа дагаад өнөөдөр гадуур хооллож, хамтдаа батериа татуулах биз. Ккк.
Сайхан хайрын үр дүнд хүн болж мэндлээд, хүн болж амьдрах сайхан юм байна шүү дээ. Гэхдээ тэр үед сансарт монгол хүн нисээгүй байсан бол би энэ хорвоод мэндлэх байсан болов уу. Бүү мэд. Асуудлыг нээлттэй орхие. Одоо дискаашн явсаа.

Самурай, Гейша, Якуза бас Сумо

2010-03-11T20:57:00.000-08:00

Япончуудын тухай ном зохиол, кино жүжиг, мэдээ мэдээлэлүүдийг үзээд байхнээ надад нэг зүйл улам ихээр мэдрэгдэх юм. Ер нь Япончуудын уламжлалт соёл, зан заншил, амьдрал ахуйд итгэл хүндлэл, дэг жаяг, ёс суртахуун гэдэг юм зүйл асар том оронзай эзэлдэг бололтой.

Жишээлбэл самурай гэж хэсэг нөхдүүд байсан байгаа юм. Бүүр феодолийн нийгмийн үед бүхэл бүтэн нийгмийн анги болж байсан нөхдүүд юм билээ. Самурайг хүмүүс ихэвчлэн цэрэг, тулааны хүн гэдгээр төсөөлдөг боловч үнэн хэрэг дээрээ ёс суртахууныг шүтэн дээдэлсэн үнэнч “төрийн хар хүн” байсан байгаа юм. Бараг гурван зуу шахуу жил амар амгалан байсан Эдо эринд самурай нар нь дайнч эр гэхээсээ илүү эр хүний жинхэнэ “жишиг” ямар байх ёстойн тод томруун жишээ болж төлөвшиж ирсэн байна. Үүнээс үүдэлтэйгээр үүссэн асар том философи бүхий самурайн ёсыг “Бушидо” гэх бөгөөд өдгөөг хүртэл үнэ цэнээ алдаагүй улам бүр гайхагдсан ёс заншил болжээ. Эр хүн хэрхэн хэлсэндээ хүрдэг, эр хүний амлалт, бодол ухаан гэж ямар ноён нуруутай, туйлбартай, үнэнч байдгийн жишээг самурайн ёсноос харж болохоор. Харин итгэлийг хөсөрдүүлж, нэр төрөө хугалсан тохиолдолд гэдсээ хүүлж үхдэг байсан ба үүнийг “Харакири хийх” гэдгийг олон хүн мэднэ. Ингэж гэдсээ хүүлэх нь зүгээр нэг амиа хорлох үйлдэл биш, өөрийгөө шийтгэх нэг төрлийн ёслол байсан гэж тайлбарладаг. Монголчуудын дунд “эр хүн хэлсэндээ, эмээлт морь зорьсондоо” , эсвэл “Муу амьд явахаар сайн үх” гэх мэт Бушидо ёсыг санагдуулам зүйр цэцэн үгс их байсан нь энэ талын соёл уламжлал Монгол ахуйд ч байсныг гэрчилнэ. Гагцхүү цагийн уртад сарниж замхарсанаараа Бушидо ёсноос өөр байж болох талтай.

Самурайн ёс жаяг, ёс суртахуун өдгөө ч Японд бий. “Орчин цагийн самурай”-нууд костюм өмсөж зангиа зүүсэн болохоос бус бизнес, улс төрийн салбарт одоо ч “Бүшидо”-гоо мөрдсөөр буй. Ганцхан асуудал болоход Японы засгийн газрын гишүүд яаж өөрсдөө огцорч байгааг та бид зурагтаар харж л байсан. Хариуцлага бол хариуцлага. Харин манайд буруутай нь тодорхой байхад сандал ширээнээсээ зүүгдсэн сайд дарга нар зөндөө. Ичих нүүр, нэр төр нь бүгд албан тушаал мөнгөний боол болчихсон болохоор арга ч үгүй биз.

BUSHIDO-The Soul of Japan, 1900. Нийтобэ Иназогийн тухай зохиогч Өөрийгөө хөгжүүлье! (2004) номонд “Европт иргэний хувьсгалаар капиталистууд бэлтгэгдэн төрсөн бол, Японд самурайн хувьсгалаар менежерүүд бэлтгэгджээ” гэж дүгнэсэн байдаг. Японы томоохон корпорациудын амжилтын нууц бол бас л “Бушидо”. Нэр төр, хариуцлага, итгэл, ёс суртахуун бол тэдний бизнесийн амжилтын хөдөлгүүр нь. Өнөөдөр хүртэл Япончууд алдаатай үйлдвэрлэсэн машины дэлхий дахинаас эргүүлэн татаж, бүх зардлыг хариуцаж байгааг харахад бизнесийн хариуцлага гээч чухам юу болохыг олж харж болохоор. Энэ бол самурайн ёс. Энэ бол хөгжлийн түлхүүр.

Гейша гээд хүүхнүүд бас Японд байж (одоо ч Киотод байдаг гэнэ). Зарим хүмүүс биеэ үнэлэгчидтэй андуурдаг тал бий. Гэхдээ Гейша бол үндсэндээ соёл, ёс жаягийн нэгдэл юм. Эмэгтэй хүний төгс төгөлдөр шинжийг илтгэгч, Японы нийгмийн бахархал байсаар ирсэн нь түүний ажил үүрэгт секс үйлчилгээ ордоггүйтэй холбоотой. Гейша хэн нэгэнд энгэрээ нээнэ гэдэг өөрийнх нь дур хүслийн хэрэг аж.

Гейшагаас авах юм их байнаа. Жишээлбэл Гейша бүсгүй гоё сайхан харагдах, биеэ сайхан авч явахаас гадна урлагийн авъяастай, мэдрэмжтэй хамгийн гол нь ухаалаг байх гэдэг зарчим юм. Гоо сайхан, биеэ авч явах байдал, ухаан гурав хэрхэн нэгдэн нийлж байж “жинхэнэ эмэгтэй” хэрхэн бүрддэгийг Гейшагийн соёл харуулдаг юм. Энэ нь эмэгтэй хүнийг жинхэнэ утгаар нь ойлгож, тэднийг хүндэлэх хайрлахад маш чухал нөлөөтэй. Зарим нэг эрчүүдийн “бүсгүй үс урт, ухаан богино” гэх үзэл баримтлалыг Гейшагийн соёл сөрж зогсдогоороо үнэ цэнэтэй юм. Мэдээж Гейшагийн ёсонд бас ёс суртахуун, хариуцлага, шийтгэл бүгд бий.

Угаас дорно дахинд ч тэр, өрнийн түүхэнд ч тэр эмэгтэйчүүдийн үүрэг роль маш их байсан нь тэдний ухааны цар хүрээг харуулж байгаагийн гол илрэл билээ. Харин ч бүсгүй хүний удирдсан төр, нийгэм амар амгалан байх бөгөөд тэд хэзээ ч эрчүүд шиг эрх мэдэл, эд хөрөнгөний төлөө дайтан тулалддаггүйгээрээ гайхамшигтай.

Японд бас Якуза нар хэмээх хэсэг бүлэг нөхдүүд одоо ч бий. Тэд хар талын зам мөрийг хөөсөн, харгис хатуу, зохион байгуулалттай гэмт бүлэглэл боловч тэднээс авах юм их бий. Якузад өөрийн гэсэн ёс жаяг, ёс суртахуун, хариуцлага бий. Тиймдээ Якуза бүлэглэл нь дэлхийн хамгийн том гэмт бүлэглэлүүдийн тоонд зүй ёсоор ордог.

Түүхийн хувьд Эдогийн үеэс эхлэлтэй гэх боловч өнөөг хүртэл сайн тогтоогдоогүй. Якуза нарын өөрсдийнх нь үзэж байгаагаар тэдний үүсэл нь тухайн үеийн дээрэмчин жанжидаас тосгоныг хамгаалж улмаар тэнд журам сахиулагч бүлгээс гаралтай гэж үздэг. Зарим нэг дутагдлыг нь үл тооцвол тэд англиар бол Робин Гүүд, манайхаан бол “шилийн сайн эрс” гэдэг шиг ард түмний дунд баатрууд хэмээн цоллогддог байна.

Ер нь бол Якуза нь дэлхийн бусад гэмт бүлэглэлүүдийн жишиг болдог гэхэд бараг болно. Гэмт хэрэгтэн гэхээр заавал муу муухай бүхний үүр уурхай байх албагүйг Якузагийн ёс журам, андгай тангараг, шийтгэл гэх мэт зүйлсээс харж болно. Зарим тохиолдолд (газар хөдлөлтийн дараа ч юмуу) Якуза нар ард иргэдэд туслах ажилд хамгийн голлох нөлөөтэй оролцох тохиолдол ч байдаг.

Түүнчлэн Якуза нар ууж иддэг зүйлс, хэрэглэдэг үг хэллэг, хувцас, бүтэн биеийн шивээс, тоглодог мөрийтэй тоглоом гээд асар их соёлын элемэнтүүдийг өөртөө агуулсанаараа онцлогтой. Якузад дүрэм журам байх ба хамгийн гол нь самурайн “бушидо” ёс бас мөрдөгддөг. Тиймдээ ч энэхүү гэмт бүлэглэлийн нөлөө, нэр хүнд одоо ч хүчтэй байдаг төдийгүй Якуза бүлэглэлийн зарим толгойлогчидийн нэр олон түмэнд нээлттэй байдаг байна.

Японд Сумо хэмээх бөхийн спорт байна. Бид бүгд мэднэ. Манай хэсэг залуус тэнд түйвээж яваа. Харахад урамтай сайхан л байдаг юм. Гэхдээ сумо ч бас Японых л юм болохоороо айхтар дүрэм журамтай. Манайх үндэсний бөх шиг найраа, өгөө аваа, нутгийн дүү гэх мэт асуудлууд байдаггүйгээрээ сумо олон улсын том спорт болж хөгжиж чадсан. Сумогийн хамгийн гол онцлог нь спорт, соёл 2-ийн нэгдэлийг агуулж чаддагт оршино.

Сумод допингийн шинжилгээ авдаггүй гэж сонссон. Энэ нь сумод хүртэл “итгэлцэл” хэмээх өнөө том “Бушидо” ёс явж байгааг харуулж байна. Итгэлцэл байхад заавал цаасан дээр гэрээ байгуулах албагүй, заавал нотариат гэдэг газраар үйлчүүлэх албагүй, заавал нэгнийгээ шалгаж байцаах аргагүй юм билээ л дээ. Тэгээд ч бөхчүүд нь ард түмнийхээ тэр сайхан итгэл, хайр хүндлэлийг дааж явах хариуцлагыг нууруун дээрээ үүрсэн. Дааж явж чаддагаараа ч Сумо хөгжиж байгаа юм бишүү. Аливаа зүйлд сэтгэлээсээ хандах, ёс журамтай байх, хариуцлагатай байх, үнэнч байх, тэвчээртэй байхын тод томруун жишээг өнөөгийн Япон улсын хөгжлөөс харж болох бизээ.

Харин зах хязгааргүй нутагтаа хүссэнээрээ хашаа зоож, гудамж талбайдаа хогоо хаячихаад хэнэггүйхэн алхах бидэнд Япончуудаас авах ёс заншил их л байх шиг.

Монголчууд бид чинь баялаг түүхтэй ёс заншилийн эрдэмт өвтэйсэн, байгалиа бохирдуулсан хүнийг цаазаар авдаг Их засаг хуультайсан, аавынхаа өмнө архи уудаггүй жудагтай Монгол эрсийн удамсан, алсын хараатай тулгар төртэй их түүхийн үргэлжлэлсэн...

Би бурууууууууууууууугүй ээ...

2010-03-08T06:42:00.000-08:00

Би заримдаа гайхаад байдаг юм. Надад нэг улаавтар туяатай цамц бий л дээ. Гэтэл яагаад ч юм би тэр цамцыг өмссөн өдөрөө л шоудаад байдаг юм шиг санагдаад явчихлаа. Гэхдээ тохиолдол байж магадгүй. Юу ч гэсэн үнэн эсэхийг магадлаж туршиж үзэхээр шийдлээ. Ерөөсөө шоудах байтугай сонинтох ч шансгүй нэг өдөр өнөө муу хэргийн эзэн, хэнгэргийн дохиур цамцыг чинь өмсөөд ажилдаа явлаа. Тэгсэн яасан. Яах аргагүй шоудахаас өөр аргагүй нөхцөл байдал үүсээд. Тэгээд шоудчихсан. ккк

Надад ямар буруу байх биш. Цамцанд л буруу байна. Найз нөхөдтэйгээ наргиж цэнгэхгүйгээр хэд хоног ч тэсдэггүй муу зуршил минь энэ “буруутан”-тай л холбоотой байж. Ашгүй хэргийн эзнийг оллоо. Мэдээж цамц буруутан харин би бол “энхийн цагаан тагтаа”.

Хэргийн эзнийг олсоноос хойш нэг сар өнгөрлөө. Гэвч тэр цамцыг өмсөхгүй байсан ч шоудалтын ритм алдагдсангүй. Тэгэхээр цамцаас гадна дахиад нэг өөр буруутан байж л таарах нь. Ер нь бол цамцны ард өөр нэг хамсаатан байхыг үгүйсгэхгүй. Энэ удаад цэнхэр жийнс үү, хар гутал уу. Аль нэг нь. Эсвэл 2-лаа цамцны хамсаатан байх. Харин би бол “анхны цагаан цас” юм чинь юу гэж буруутай байхав дээ тэ.

P S: Тодорхой шалтгааны улмаас хувцасны өнгө болон нэрийг өөрчилсөн болно :P

Би Ромео биш, чи ч бас Жулетта биш

2010-02-08T02:03:00.000-08:00

Амьдрал өөрөө жүжиг юм бол би жүжгийн гол дүр. Гэхдээ Ромео лав биш. Дурлахдаа яг Ромео шиг эхэлдэг байж магадгүй гэхдээ дуусгахдаа харин Гамлет шиг ч байж болох юм.
Угаасаа бурхан чөтгөр 2-ийн буцах хаяггүй гэрээний үр дүн, хүн нэртэй махан цогцостой, хүсэлдээ хөтлүүлж, хясалдаа хазаарлуулдаг би эгэл хүн. Хайр халамж, харгис хатуу, дур хүсэл, уйтгар гуниг миний эд эс ширхэг бүрийг энэ тэнцүүхэн хуваан эзэмшдэг. Тиймдээ ч надад Макбетийн сайхан чанар, Оттелогийн уур хилэн бүгд бий.
Яагаад гэдэг асуулт бүхэнд яг ижилхэн хариулт байдаггүй болохоор... Ядаж Лир ваны насанд хүрчихээд асууя. Харин одоо бол надад мэдрэмж байна... Орших уу, эс орших уу гэсэн эргэлзээ байна.

Жулетта минь чи үнэндээ хагаслаад хазсан час улаан хортой алим. Тийм болохоор чи Жулетта биш.
Харин би бол өөрийнхөө төлөө биш өрөөлийн төлөө үхэж чадах Меркуцио, харин чи бол Меркциогийн цээжинд гүн орсон цустай илд.
Төгсгөлийн үзэгдэл:
Цусан дундаа хэвтэх Меркуцио, түүнийг тойрон сандралдах хүмүүс. Хаанаас ч юм нэг хүний хоолой намуухан өнгөөр өгүүлэх нь : “- Хундага чинь үргэлж дүүрэн байх болно. Учир нь би чиний дарс болсон. Би энэ гараараа нулимсийг чинь арчиж өгнө. Тийм болохоор чи минь битгий уйл”

Хуйвалдааны онолоор синдромдохуй

2010-01-25T21:35:00.000-08:00

Чиний эргэн тойрны бүх зүйлс худлаа, хуурамч, одоо өрнөж буй болон өнгөрч одсон бүх үйл явдал эхнээсээ л төлөвлөгдсөн байсан. Чиний амьдарч байгаа нийгэм хүртэл зүгээр л хуйвалдаан. Гэтэл чи гэж нэг гэнэн цагаан амьтан өөртөө зөндөө их мөрөөдөл, зорилго өвөртөлчихөөд сураад, ажилаад л байдаг. Бас ИРЭЭДҮЙ гэдэг зүгрүү ИТГЭЛ гэдэг хийсвэрлэл тээсээр, болж бүтэх бүхэнд баярласаар, болохгүй бүтэхгүй зүйлд нь бухимдаж амьдарсаар л...

Хоног өдрүүд чамаар зүгээр л тоглож байгааг мэдэх үү. Тархийг чинь угаах түм буман мэдээллийн хэрэгслүүд чамайг аалзны торонд баригдсан ганц ялаа шиг болгож байгааг мэдэх үү. Чамайг бодож сэтгэхгүй байх тусам, чамайг зомби болох тусам хэн нэгэнд ашигтай. Бүүр маш их ашигтай.
2012 онд дэлхий сөнөнө. Энийг НАСА аль хэдийн мэдчихсэн. Тэхдээ нуучихсан. Гэтэл чи мэдээгүй, харин 2013 онд худалдаж авах байшингаа мөрөөдөөл явж байгаа.
1964 онд Америкад харь гаргийн хөлөг сүйрсэн. Даанч хар хувцастай хүмүүс ирээд үзсэн харсан хүмүүсийнх ой ухааныг арччихсан. Үүнийг FBI мэдэж байгаа. Гэтэл чи л бас мэдээгүйдээ харь гариг гэж байхгүй тэр бол кино гээл явж байгаа.
Элвис Пресли, Майкл Жексон аль аль нь үхээгүй. Тэд зүгээр л алдар хүндээс залхсан. Үүнийг дэлхийн том шоу менежерүүд мэдэж л байгаа. Харин чи үүнийг мэдээгүй болохоор тэдний араас харамсаж, бас СД-ийг нь худалдаж авсан.
2001 оны 9 сарын 11. Энэ өдөр хоёр өндөр цамхагруу лалынхан биш америкчууд өөрсдөө довтолсон. Бурууг нь аль хэдийн үхчихсэн Осамаруу чихсэн. Дайн хийх далим гаргах нь АНУ-ийн эдийн засагт ашигтай байсан болохоор л тэр. Үүнийг Масончууд мэдэж байгаа. Харин чи мэдээгүйдээ террористуудыг үзэн яддаг.
Дэлхийн эдийн засаг хямраагүй. Энэ бол зүгээр л дэлхийн олигархуудын ээлжит тоглоом. Тэд бизнесээ хумих сонирхолтой байгаа. Харин чи үүнийг мэдээгүй болохоороо мөнгөний биш сэтгэцийн хямралд орсон.
Сонгууль бол шоу. Хэн гарч ирэх нь хэдэн жилийн өмнөөс төлөвлөгдсөн байдаг. Зүгээр л тэд тархийг чинь угаах зорилгоор ээлжит сурталчилгаануудаа явуулдаг. Үүнийг намын томчууд мэдэж л байгаа. Харин чи мэдээгүйдээ хэн нэгнийг дэмжиж бас муулж, сайн найзтайгаа хүртэл намаас болж хэрэлдсэн.
Монгол улс ядуу байгаа нь зарим хүмүүст ашигтай. Ядуу хүмүүсийн тархийг угаах амархан, бас ходоодоор нь сэтгүүлэх ч амархан. Ийм байлгахын тулд тэд олон жилийн турш мэрийж ирсэн. Тэднийг гадаад түншүүд нь мэдэж л байгаа. Харин чи үүнийг мэдээгүйдээ өнөөдрөө золиослон байж маргаашын төлөө хөдөлмөрлөдөг.
Эрх чөлөө, эдийн засаг, мөнгө төгрөг, хууль эрх зүй, шинжлэх ухаан, шашин, соёл, түүх бүгд худал. Тэд бол чамаас илүү ухаантай хүний зохиосон үлгэр. Тэд дүрмийг зохиосон. Чамаар л харин мөрдүүлдэг. ЧИ ҮҮНИЙГ Л ГАНЦХАН МЭДЭЭГҮЙДЭЭ ДЭЛХИЙН ҮР, БАЙГАЛИЙН БИЕТ ГЭДГЭЭ МАРТЧИХСАН.

Кино хошигнол: Садист Энэтхэгчүүд

2010-01-22T00:22:00.000-08:00

Хүүхэд байхад Энэтхэг кинонд их дуртай байж билээ. Одоо ч тэгээд орон орны кино үзээд хуучны сайхан “Болливүүд”-ийнхаа киногоо бараг үзэхээ байж дээ. За тэр ч яахав. Одоо үндсэн ажилдаа оръё. Хуучны Энэтхэг кинонуудын штампад орсон хэсгүүдээс:

Энэтхэгчүүд дуу бүжгийн тун их авъяастай. Ямар сайндаа л зүв зүгээр явж байсанаа гэнэт юм хатгасан юм шиг дуулж бүжиглээд эхлэхэв дээ. За яахав гол дүрийн нөхдүүд бие биендээ дурлаж хайрлаад дуулж, бүжиглээ биз гэж бодоё. Гэтэл хаанаас ч юм нээх олон нөхдүүд гэнэт гарч ирээд ард нь бүжиглээд байдгийг л гайхаад байдаг юм. Тэр олон жижигхэн бор нөхдүүд хэзээ хэн дуулж бүжиглэхнүү гээл юм хумны ард нуугдчихсан хүлээж байдаг юм шиг байгаам. Тэгээл хэн нэгэн бүжиглээд эхэлвэл гэнэт гарч ирээд яг ижилхэн жигд бүжиглэжлэж нтр. Авъяастай золигнууд шүү Сайнаар хэлвэл тэд нар үнэн сэтгэлээрээ гарууд. Харин муугаар хэлэх юм бол зүгээр дагалдан баясагчид төдий.

Бас Энэтхэг хүмүүс ярихдаа нэх сонин салга хүн аятай толгойгоо хоёр тийш нь хөдөлгөж санжгануулж нтр. Тэр нь чухам юу илэрхийлээд байгааг бол одоо ч хүртэл ойлгохгүйл явна. За тэрч яахав улс үндэстний онцлог юм байгааз гээд орхие. Харин Энэтхэгчүүдийн бие хаа нь нэх сонин бүтэцтэй байдаг юм шиг байгаан. Цохингууд “-дүшш дүшш дүшш” гээл дуу гараад байдаг юм. Махан биетийг цохиход тийм чимээ гарна гэж ерөөсөө бодож байгаагүй миний хувьд үнэхээр гайхалтай санагддаг байж билээ.

Бас Энэтхэгийн дайсны талын гар, нэг ёсондоо муу талын баатар нь цаанаа нэх зэвүүн царайтай. Ядаж байхад мушгирсан сахал, хөмсөгтэй. Бөөн уур уцаар. Тэгээд ч зогсохгүй садист. Хана түшүүлж байгаад ташуурдана, эсвэл хүлж байгаад ташуурдана. Яасан ч ташуурдана. Кк. Саваа модоор зодно. Олон хүмүүсээр бариулж байгаад элэгдэнэ. Тэднүүдээс бултах газар байхгүй. Ташуурдахыг нь мэдсээр байж ядуу залуу заавал баян хүүхэнд дурлана. Тэгээл бөөн адал явдал.

Миний анзаарснаар Энэтхэгчүүдийн 2-ийн тоонд дуртай бололтой. Хуучны кинонууд бараг бүгд л 2 ангитай. Гол дүрүүд нь хүртэл хос хосоороо. Кришан Каня 2, Гита Зита 2, Карун Аржун 2 гэх мэтээр нэрлээд нэрлээд явчихна.

Энэтхэг киноны хүүхнүүд гэж нэг айхтар амьтад байна. Нуль нүд. Бүжиглэхдээ нүдээ хүртэл бүжиглүүлнэ. Нүдээрээ хайрлана, эрхлэнэ, нүдээрээ загнана, нүдээрээ зодолдохоос бусдыг л бараг хийж байх шиг. Тэр том нүднээс шанага шанага нулимс асгарна. Гүй мөн айхтар улс шүү.

Холбоотой бичлэг: Кино хошигнол: Америк киноны нийтлэг дүр зургуудаас

Хувилбар А ба Б

2010-01-15T01:48:00.000-08:00

Амьдрал олон хувилбартай. Асуулт ч бас олон хариулттай. Зүрх, тархи 2 тус тусдаа мэдрэмжтэй. Зөвхөн би л харин цорын ганц.
Би хувьдаа тархиндаа байгаа бодлоо гаднах байдлаараа тэр болгон илэрхийлээд байдаггүй. Заримдаа дотроо нэгийг санавч, гаднаа өөрийг өгүүлэх үе байдаг. Яагаад гэж үү. Яагаад гэвэл амьдрал намайг хашир, бардам, зэвүүн, хүний үнэргүй, ухаантай, бас тэнэг болгосон болохоор. Би тэр бүх зан араншингуудын харилцан үйлчлэлийн нөлөөгөөр амьдардаг болохоор надад үргэлж А ба Б хувилбар байдаг юм.

За тэгэхээр хэдүүлээ ам хэлээ ашиглан өгүүлж буй үг яриа болон үйл хөдлөлөө “А хувилбар” гэе. Харин тархинд байгаа буюу гаднаа илэрхийлэхгүйгээр дотроо хадгалан буй бодлоо “Б хувилбар” гэе. Өнгөрсөнөө эргэн санагалзваас:
Сурагч нас. Багш загнаж байна: “ - Чи дандаа даалгавраа хийдэггүй. Бас сахилгагүй. Эцэг эх чинь чамайг ингэж хүмүүжүүлсэн үү? ” Энэ үед
“А хувилбар” : Доошоо харан шал ширтэнэ. Нусаа үе үе татаж гэмшсэн дүр үзүүлнэ.
“Б хувилбар” : Багшийн хүүхэд ч бас сахилгагүй. Тэгэхээр багш өөрөө тэгж хүмүүжүүлсэн байх нь.
Оюутан нас. Нэг охинтой гадуур зугаалж явав. Тэгтэл хажуугаар зөрж өнгөрөх хэдэн залуус цуг яваа охины маань өгзөгөн дээр алгаадаад авлаа. Энэ үед
“А хувилбар” : Эмэгтэй хүн дагуулж яваа эр хүний омголон зангаар хараал урсган. Хамгийн наад захад нь яваа нэг баагийгийн малгайных нь юүдэнгээс татаад унагачихлаа. Нэгэнт хүн унагацан хүн чинь бантсандаа залгуулаад “-алы шүү баньд минь” гээд хэлчихлээ.
“Б хувилбар” : Одоо ч би эд нарт алуулсаан.
Нэг охинтой шөнийг үдэв. Өглөө нь нөгөө охин хэлж байна: “- Чи бид 2 заяаны хосууд байхаа. Одоо бид 2-ийг хэн ч салгахгүй” энэ үед
“А хувилбар” : “-Тийм үү. хэхэ. Магадгүй л юм”
“Б хувилбар” : “Ганц шөнийн жаргал шүү дээ хонгор мээн”
Ээж хэлж байна. “- Чи дүүдээ ганц хоёр юм хэлж байгаач. Наад чинь урд шөнө гэртээ ирж хоноогүй. Миний үгийг тоохгүй юм. Одоо дүүтэйгээ уулз” Дүү дээрээ очлоо. Энэ үед
“А хувилбар” : Уурласан шинжтэйгээр “ –Чи ээж, аавыг юм хэлэхгүй болохоор элэг бариад тэнээд байгаарай. Төгсөх курсын оюутан байж хичээл мичээлээ хий. Би чиний насан дээр юун охин мохин бэ. Номын санд л сууж байдаг байлаа. Дахиад ингэвэл дэмий шүү зүгээр”
“Б хувилбар” : “хихи. За залуу байхад нэг иймэрхүү байдаг даа. Нас нь юм даа.”
Эхнэрээ уурлуулчлаа. Хэрэлдэв. Энэ үед
“А хувилбар” : “-Чи л дандаа эхэлдэг биздээ. Чамтай чамгүй би амьдарчихна за. Би яваад өгөе за”
“Б хувилбар” :“Миний буруу. Чи намайг битгий яв гээд хэлчихвэл би бууж өглөө. Хань минь намайг уучилчихаач”
Гэх мэт. Амьдрал олон хувилбартай, асуулт ч бас олон хариулттай. Зүрх, тархи 2 тус тусдаа мэдрэмжтэй. Зөрлөг замууд олон салаатай. Хүний амьдрал алдаа оноотой, Хүсэл, хясал ч ээлж дараатай.

Тухайн үеийн нөхцөл байдал

2010-01-12T21:26:00.000-08:00

За сайн байцгаана уу. Би амьд байгаа шүү. Кк. Завгүй шахуу өдрүүд үргэлжилсээр. Завгүй шахуу ч гэлтгүй бараг ямар ч завгүй. Эрх биш хүн болохоор унтах, идэх зав бол гаргахын. Бусад зав бол хэцүүхэн л байна. Гэхдээ тархинд бол зав бас байх шиг байнаа. Зүгээр сууж байхад есөн жорийн юм бодогдох юм.

Би бодлоо л доо. Хувь хүний төрлөх зан араншин ямар ч байлаа гэсэн тэрнээс илүүтэйгээр “тухайн үеийн нөхцөл байдал” гэдэг хүчин зүйл хүний амьдралд илүү хүчтэй нөлөөлдөг юм болов уу гэсэн бодол тархинд эргэлдэх юм. Жишээлбэл миний өсөж төрсөн хүмүүжилд би хэзээ ч гараараа хоол идэж байгаагүй. Аа гэхдээ хөдөө гадаа судалгааны ажилаар явж байхдаа. Тэр халбага сэрээ бол ёстой яршигл байна. Хөдөө явж байж орчин нөхцөлөө мэдрэхгүй “-надаа сэрээ” гээд тэнэгтээд байвал яах уу кк. Германчууд, Оросууд, Хятадууд, Америкчуудтай судалгаанд явж байлаа. Тэд нар ч бас ялгаагүй л юм билээ. Уг нь Герман соёл гэж сүрхий юм байдаг биздээ. Гэтэл Монголын хээр хөдөөд бол тэр “дойч соёл” нтр ёстой падлий ч байхгүйдээ харин ч нэг.

Хүнтэй хэрэлдэж зодолдох уг нь дэмий л дээ. Буруу л зүйл байх. Гэхдээ яах аргагүй нэг сонин баагий нүүрэн дундуур цохиод авбал би лав ийсүс царайлаад нөгөө хацраа тавьж өгж тэнэгтэхгүй. Харин нүдний шилээ авч кармаандаа тайван гэгч нь хийж байгаад ганц сайн мөргөнө дөө. Кк. Гэх мэт.

Цэрэгт оччихоод би чинь эрх энхрий амьтан. Өлсөж болохгүй, даарч бас болохгүй, ядарч болохгүй гээд маяглаад байвал цаадуулдаа алуулдын байгааздээ. Кк. Бас зөндөө олон жишээнүүд байнаа байна.

Би уг нь ийм хүн гэвч даанч тухайн үеийн нөхцөл байдал тийм байлаа. Одоо яаая гэхэв. ккк. Нэг бодлын өөрийнхөө буруу үйлдлийг өмөөрч хамгаалж, шалтагсаж байгаа зан ч юм шиг. Гэхдээ хэн мэдлээ. Хорвоо дэлхий угаасаа л ийм. Ийм болохоор ингэж л амьдарна.

Тийм бол тэгж л амьдарна. Нөгөө сохрын газар сохор, доголонгийн газар доголон болж явнаа гэдэг л энэ байх даа.

Баялаг болгон өмч болдоггүй

2009-12-24T00:06:00.000-08:00

Эхлүүлэх нь ...

Хүн төрөлхтөний туулж өнгөрүүлсэн түүхэн замнал өмчтэй зайлшгүй холбогдож ирсэн байдаг. Өөрөөр хэлбэл хүн-нийгэм болон аливаа иргэншилд өмчийн гүйцэтгэх үүрэг, түүний нөлөө үүсгэх нөхцөл үр дагавар нь янз бүр байсан билээ. Оюун ухаант хүн үүссэн цагаасаа өмч гэдэг ухагдахууныг гаргаж ирсэн ба энэ нь тэдэнд хэрхэн нөлөөлж байгаа, мөн түүний мөн чанарыг судалж, түүнд тохирох тодорхойлолтыг өөр өөрсдийн туулж өнгөрүүлсэн түүхэн туршлагад үндэслэн янз бүрийн онол сургаалиудыг агуу эрдэмтэн мэргэд өгсөөр ирсэн билээ. Одоо ч энэхүү өмчийн талаар судлах зүйл өргөн цар хүрээг хамарч байна.

Үзэл баримтлал ба хөгжил

Дэлхийн хөгжлийн түүхэнд өмчийн талаарх ойлголт тодорхой үе шаттайгаар хөгжиж ирсэн. Анхны суурь онолын сургаалийг МЭӨ агуу сэтгэгчдийн өлгий Грект гаргасан гэж үздэг. Энэ үеийн сургаальд өмчийн харилцаа, түүний үр дагавар, бий болох засаглалыг судалж байсан. “ Өмч нь аливаа нийгмийн харилцааг зохицуулах, тэдний хуваарилтад чухал үүрэгтэй объект мөн ” гэсэн санааг дэвшүүлж байв. Харин дундад зуун буюу сэргэн мандалтын үед баруун Европ, Герман, Франц, Голланд зэрэг орнуудад өмч хөрөнгийг зүй ёсоор чухалчлан үзэж түүний үр дагаварыг онолын түвшинд тавих болсон. Тухайн үеийн гол төлөөлөгч Ж. Гаррингтон “ өмч засаглалгүй байдлаас үүсдэггүй. Харин ч түүний эсрэг засаглалыг бий болгогч зүйл мөн ” гэж үзсэн байдаг нь тухайн үеэс эхэлж өмчийн талаарх өнөөгийн үзэл баримтлал төлөвшиж эхэлснийг харуулж байна.

Матерлистуудын эсрэг хийсэн идеаль дайн

Өнгөрсөн 20-р зууныг бид өөрчлөн байгуулалтын зуун гэдгээр мэдэх билээ. Үнэндээ 20-р зуун бол өөрчлөн байгуулалтаас илүүтэй үзэл сурталын буюу нийгмийн дифферэнциацлын зуун байсан юм. Энэ үед дэлхийн том том эмпирүүд нуран унаж олон колони улс орнууд задарсан. Түүгээр ч зогсохгүй 20-р зуунд явагдсан нийгэмчлэлийн хувьсгал нь дэлхий нийтийг өмчид хандах үзэл баримтлалаараа хуваагдах үүд хаалгыг нээсэн байна. Ийнхүү дэлхийн соёл иргэншил капиталист болон социалист гэсэн хоёр лагерт хуваагдлаа. Өөрөөр хэлбэл энэ хуваагдал нь өмч түүний үүсгэх засаглал болон өмчийн хуваарилалт зэргийг хэрхэн үзэж буйгаас хамаарсан улс гүрнүүдийн талцал байлаа .

Капиталистууд өмчийг тодорхойлохдоо түүнийг нийгмийн хөдөлгөгч хүч гэж үзэж байсан бол социалистууд түүний эсрэгээр нийгмийг доголдуулагч ангийн ялгаа үүсгэгч бөгөөд өмчийг бүгд нийтээр адил тэгш хуваарилах нь оновчтой гэж үзэж байсан. Үүнд л дээрх хоёр системийн өмчийн талаарх ойлголтын гол ялгаа гарч байгаа юм.

21-р зуунд ч энэ онол сургаалиар хөгжиж буй цөөн хэдэн улс бий. Үүнд: Хойд Солонгос, Куба, Вьетнам зэрэг орнуудыг оруулж болно. Яагаад дээрхэд Хятад улсыг оруулаагүйд гайхаж магадгүй. Учир нь Хятад улсын хувьд эдийн засаг худалдааны нээлттэй байдлыг чухалчилсан байдаг нь өмч эд хөрөнгө хуримтлуулахад саад болдоггүй. Харин дээр дурьдсан орнуудын хувьд өмч олж авах арга зам болон өмч хуримтлуулж болох хязгаарыг тогтоосон байдаг нь далд утгаараа засаглалд оролцох байдлыг хязгаарлаж байгаа явдал бөгөөд төрийн монополийг тогтоохыг оролддог.

Аксиом

Ер нь дэлхийн түүхэнд өмчийн талаарх ойлголтыг засаглалтай холбож харин түүнийг сонгодог утгаар нь газартай холбон тайлбарладаг байсан.

“Аливаа хүн баялагийг хэдий чинээ цуглуулж чадна төдий чинээ өөрийн вант улсын хэрэм цайзыг бэхжүүлж чадна”. Энэ нь юу гэсэн үг вэ? гэвэл аливаа өмч нь өөртөө дараах үнэт зүйлсийг буюу эерэг талыг агуулж байдаг. Үүнд:

- Эрх мэдэл ( захирах эрх )

- Эдийн засгийн хараат бус байдал ( үл захирагдах эрх ). Эндээс

засаглал үүсэн гардаг. Харин сөрөг тал нь

- Ангийн ялгаа үүсгэх ( зайлшгүй захирагдах үүрэг )

- Аливаа шуналын үндэс суурь болдог. Дээрх эерэг сөрөг хоёр

талыг хууль эрх зүйгээр зохицуулж нийгмийн процессийн аюулгүй байдлыг хангана. Өөрөөр хэлбэл бүх юм эрэмбэ цэгцлэгдсэн байх ёстой буюу хоёр талд хамаарагдах субьектууд хуулиар хамгаалагдана гэсэн үг юм.

Монголд капитализм эхэлсэн нь...

1990 оны ардчилсан хувьсгалын жинхэнэ оршин тогтнох үндэс нь хувийн өмч байсан юм. Хувийн өмчийг хууль эрх зүйн орчноор баталгаажуулж байж гэмээ нь сая нэг ардчилсан нийгэм үндсэн утгаараа оршин тогтнох байлаа. Үүнийг ч тухайн үеийн ардчилсан сэхээтнүүд мэдэж байсан тул 1991 онд “Өмч хувьчлалын тухай” хуулийг батлан гаргасан юм. Үнээс хойш буюу сүүлийн 20-иод жилийн турш Монголчууд үйлдвэрүүдээ бизнесийн салбарынханд, малаа малчдад, орон сууц, газраа иргэдэд гэх мэт томоохон өмч хувьчлалуудыг ээлж дараатай явуулжээ. Мөн энэ хооронд өмч хувьчлалтай холбогдох 20 гаруй хуулийг ч баталсан байна.

Миний өмч бол миний л өмч

Өмч хөрөнгийг эзэнтэй болгох нь өмчийг хамгаалах шалгарсан арга гэдгийг хэн хүнгүй мэднэ. Үүний тод жишээг бид өнгөрсөн хэдэн жилийн түүхээс харж болно л доо. Жишээлбэл манай улсын мал сүрэг хамгийн ихдээ 25 сая хүрдэг байсан бол мал сүргийг хувьчилсаны дараа Монголын мал түүхэндээ байхгүй их тоо буюу 40 саяд хүртэлээ өссөн. Нийгмийн өмчид сэтгэл гаргадаггүй байсан нэгдэлчид маань хувийн өмчөө бол хуруу хумсаа хугалаад ч хамаагүй, хахир өвлийн жаварт хөлдөж үхээд ч хамаагүй хамгаалдаг, арчилдаг болсон байна.

Өмчийг хэн бүтээж байна, харин эрх мэдлийг хэн эзэмшиж байна вэ?

Хувийн өмч байхгүй бол мэдээж зах зээл байхгүй шүү дээ. Онолын хувьд авч үзвэл зах зээл байхгүй бол ардчилсан нийгэм ч бас байхгүй байх нь ойлгомжтой. Төвлөрсөн төлөвлөгөөгөөр урагшилдаг байсан эдийн засаг маань зах зээлийн эдийн засагт шилжих хамгийн анхны алхам бол нөгөө л өмч хувьчлал байсан. Төрийн өмч болон хувийн өмчийн хэмжээ харилцан тэнцвэртэй болсон тэр цаг үед л жинхэнэ утгаараа эрх мэдэл тэнцүү хуваарьлагдах ёстой. Гэхдээ манай улсын өнөөгийн дүр зургаас төрийн эрх мэдэл хэтэрхий их байгааг харж болхоор байна. (Тэгвэл төрийн үүрэг хаана байгаа юм бэ?) Хэдийгээр ДНБ-ны 80 гаран хувийг хувийн секторынхан бий болгодог бол удирдан захирах, нөлөөлөлийн эрх мэдлийн 80 хувийг төр дангаараа эзэмшиж байна. Энэ юуг харуулж байна вэ гэвэл ардчилал, эдийн засгийн зайлшгүй жам ёс гажуудаж буйг харуулж буй өнөөгийн Монголын “гаж тогтолцоо” юм.

Хуулиудын хронологи алдаа

Дээр өгүүлсэнчлэн манай улс 1991 онд “Өмч хувьчлах тухай” хуулийг баталсан билээ. Гэхдээ хамгийн сонирхолтой 1992 онд өнөөгийн бүх хуулийн үндэс суурь болох анхны ардчилсан үндсэн хуулиа баталсан байдаг. Өмчөө хувьчлаад эхэлчихсэн атлаа “Үл хөдлөх хөрөнгийн бүртгэлийн тухай” хууль нь 1997 онд батлагдаж байдаг. Өмч хөрөнгөө бүртгэж эхэлчихээд дахиад 3 жил өнгөрсөний дараагаар буюу 2000 онд “Үл хөдлөх хөрөнгийн албан татварын тухай” хуулиа дөнгөж баталж байх юм. Өмчийн харилцаа бий болоод 10 гаруй жил өнгөрч байгаа хирнээ ипотек, лизинг, узуфрукт гэх мэт зах зээлийн эдийн засагт зайлшгүй байдаг өмчийн харилцааны хэв шинжүүдийг 2002 оны шинэчилэн найруулсан “Иргэний хууль”-иар л сая нэг юм оруулж ирсэн байх юм. Ингээд бодоод үзэхээр бид чинь эрх зүйн орчны гажуудалын нөлөө зай завсараар хичнээн өмч хөрөнгөө үрэн таран хийж, хичнээн иргэд, байгууллагаа хохирон үлдэж, хичнээн банкууд том том боломжуудаа алдсан бол гэхээс үнэхээр харамсалтай. Миний бодлоор Монголд явагдсан өмч хувьчлал нь цаг хугацааны хувьд үнэхээр зөв зүйтэй алхам байсан боловч эрх зүйн орчны зай завсартай байдал, энэ талаарх иргэд олон нийтийн мэдлэг, мэдээлэлгүй байдал зэрэг нь өмч хувьчлалыг жинхэнэ утгаар нь явуулах боломжийг алдагдуулсан байна.

Үргэлжлэл бий.

Жошуагийн аавын инээмсэглэл буюу жинхэнэ эр хүн

2009-12-04T02:07:00.000-08:00

Амьдрал үнэхээр сайхан. Гэхдээ амьдралын уртыг туулах зам тэр болгон дардан байдаггүй. Зовлон зүдгүүр, хагацал нулимс хэн бүхнийг тойрч биш дайрч гардаг нь гашуун үнэн. Харин тэр бүгдийг давж гарах итгэл, хайр, тэвчээр гэж чухам юу байдаг талаар жинхэнэ эр хүн гэж ямар хүнийг хэлдэг талаар өгүүлсэн нэгэн гайхамшигт киноны талаарх сэтгэгдэлээ энэ удаад бичихээр шийдлээ.

Хайр дурлал, эр хүний 13 мэхний өмнө эрх мэдэл мөнгө төгрөг юу ч биш гэдгийг киноны эхний хэсэгт өгүүлдэг. Хөгжилтэй, жаргалтай эхний хэсэгт гарах үйл явдалууд үнэхээр романтик бас гайхалтай. Гол дүр маань тийм ч царайлаг, бие бялдар сайтай эр биш л дээ. Гэвч тэр үзэсгэлэнт сурвалжит хатагтайн хайрыг булааж хүчтэй өрсөлдөгчийг буулгаж авдаг. Өөртөө итгэлтэй, авъяаслаг, басчхүү амьдралын ухаантай нэгэн гэдэг нь киноны эхнээс л мэдэгдэж эхлэнэ. Амьдрал дээрч бас ийм л эрчүүд бүсгүйчүүдийг хайрыг татаж, бас ханийн жаргалыг мэдрүүлдэг биз.

Киноны үйл явдал үргэлжилсээр...Гол дүр маань эр хүний ёсоор айл гэр үүсгэж, үр хүүхэдтэй болжээ. Амьдрал сайхан л үргэлжилж байлаа. Гэвч аймшигт дайн тэдний хаалгыг тогшлоо.
Дайн гэж жинхэнэ ёрын эд юм даа. Амраг хосыг хагацааж, айл гэрийг бусниулж, эх үр хоёрыг салгаж чаддаг жинхэнэ амьдын там гэдэг нь л дайн байх. Хэрвээ надад энэ кинон дээр гардаг шиг үйл явдал тохиолдвол би аягүй бол уурандаа дайсны нэг цэргийг гүйж очиж барьж авч сэгсчээд тэгээд ямарч үр дүнгүй буудуулж үхэх байсан биз. Гэтэл амьдрал дээр уурлаж мунхаглах, омголонтож туйлшрахаас илүүтэй тэсвэр тэвчээр, эр хүний нарийн ухаан л чухал юм гэдгийг кино надад ойлгуулж өгсөн юмдаг.
Дэлхийн 2-р дайны үеийн бөөнөөр хорих лагерь. Тэнд хүмүүс мал шиг бэлчиж, шоргоолж шиг ажилж, эцэст нь зомгол шиг шатаж үхнэ. Киноны энэ хэсэгт гол дүр маань хайрт хүү Жошуадаа элдэв зовлон гунигийг мэдрүүлэхгүйн төлөө хэрхэн тэмцэж, зүтгэж байгааг харуулна. Дайн гээч хичнээн муухай зүйл болохыг, томчуудын ертөнц хичнээн аймшигтай болохыг бяцхан хүүдээ мэдэгдэхгүйн тулд бүхий л зүйлийг хийнэ. Хүнд хүчир ажлын дараа яаж ч ядарч байлаа ч хүүгийнхээ өмнө тэр дандаа л ИНЭЭМСЭГЛЭДЭГ. Тиймдээ ч хүү нь дайны хүнд бэрхийг мэддэггүй. Харин ээж нь яагаад өөрсдөнтэй нь цуг байхгүй байгаад л бага зэрэг гайхна бас эргэлзэнэ.
Хорих лагерь бужигнаж эхлэв. Учир нь дайснууд ялагдаж , ухарч эхэлжээ. Чөлөөлөх армийнхан хэдийн хаяанд ирж. Киноны оргил хэсэг чухам энэ үеэс үүдэж бий болно. Үймээн бужигнаан дундаас хүүгээ амьд авч үлдэж чадсан гол дүр маань (би одоо хүртэл түүний кинон дээрх нэрийг нь санахгүй байна тэгээд түүнийг хувьдаа Жошуагийн аав гэж нэрлэдэг юм) өөрсдийгөө амьд байгааг шоронгийн узель ашиглан эхнэртээ мэдэгдээд авна. Сэтгэл нь хоёр тийшээ хуваагдчихаад байлаа. Нэг талд хаана байгаа нь үл мэдэгдэх хайрт хань нь. Нөгөө талд түүний хажууд байгаа ч ямар ч хамгаалалтгүй бяцхан хүү нь. Жошуагийн аав мэргэн арга олжээ. Хүүдээ энэ бол нуугдаж тоглож байгаа юм хэмээн ойлгуулаад нууж орхино. Харин энэ хооронд тэр эхнэрээ хайсаар. Эцэст нь дайснуудад баригддаг. Гэвч тэр өөрийг нь буудан хороохоор тууж явааг хүү нь нууцаар харж байгааг мэдэх тул хөгжилтэй алхсаар туугдан одно. Тэр буудуулах нь нэгэнт тодорхой болжээ. Гэвч түүний нүүрэнд нөгөө л ИНЭЭМСЭГЛЭЛ тодрох аж.
Хайр гэж чухам юу болохыг харуулж чадах хамгийн сайн үйлдэл бол Жошуагийн аавын инээмсэглэл юм. Эмгэнэлтэй бас цаанаа зөндөө зүйлийг агуулсан гайхамшигт кино. Гайхамшиг инээмсэглэлийн үр дүнд бяцхан хүү Жошуа дайны аймшгийг мэдэхгүйгээр ээжтэйгээ уулзсанаар кино төгсөнө.
Киноны тухай нэмэлт мэдээлэл:
Киноны нэрийг англиар ‘Life is beautiful” гэдэг бөгөөд 1997 онд бүтээгдсэн Итали кино юм.
1998 оны Оскарын ёслолын ажиллагаанаас Италийн жүжигчин, найруулагч Roberto Benigni өөрийн найруулж, гол дүрд нь тоглосон энэхүү киноны дүрээрээ шилдэг эрэгтэй дүрийн шагнал хүртсэнээс гадна тухайн кино мөн жилийн Шилдэг гадаад хэл дээрх кино шагнал хүртэж чадсан. Тэрээр нэг үдшийн дотор хоёр Оскарын эзэн болсон билээ. Жошуагийн аав бодит амьдрал дээрч мундаг нэгэн байх нь. Бас нэг нэмэлт мэдээлэл дуулгахад тэрбээр кинон дээр хамтран тоглосон бүсгүйтэйгээ жинэхэнээсээ хосууд гэсэн шүү. Тэр хоёрын хамтран бүтээсэн бас өөр нэгэн агуу хайрын тухай кино байдгийг зарим хүмүүс үзсэн байлгүй. Энэ киног татаж үзэе гэж бодож байгаа бол манай MOVIE CLUB блогруу орж татаж авч болно. Бичлэгийнхээ төгсгөлд нэг үг хэлэе. Хайр мандтугай, харин дайн сөнөтүгэй... PEACE

Сүйрлийн онол буюу шилдэгүүдийн шалгарал

2009-12-03T01:09:00.000-08:00

Үлийн цагаан оготоно байгалийнхаа жам ёсоор бол 7 жил тутамд нэг удаа бөөнөөрөө сүйрдэг. Үүний шалтгаан нь тоо толгой хэт олшролтоос үүдсэн сөрөг үр дагаварууд болох тэжээлийн хомсдол, цус ойртолт, халдварт өвчин, амьдрах орчны хүрэлцээ хангамж доройтох гэх мэт хүчин зүйлсүүдээс үүдэлтэй. Нэг ёсондоо дээрх “асуудал”-ыг байгаль өөрөө зохицуулдаг байх нь. Үүнийг “Сүйрлийн онол” гэнэ. Харин хүмүүс бид байгалийн жамыг зөрчиж үлийн цагаан оготоно устгах төрөл бүрийн хор, арга технологийг ашигладаг нь эргээд үлийн цагаан оготоны тоо толгойг тодорхой хэмжээнд байлгах гол нөхцөл болдог аж. Нэг ёсондоо хүмүүс бид “сүйрлийн онол”-ыг зөрчсөнөөрөө жинхэнэ сүйрлийг бий болгож байгаа гэдэгээ тэр болгон мэддэггүй л болов уу. Энэ удаад миний бичлэгийн гол объект нь үлийн цагаан оготоно биш тул ингэсгээд завсарлая. Харин одоо үндсэн сэдэвтээ оръё.

Манай улс нэг хүнд ноогдох их дээд сургуулийн тоо, нэг хүнд ноогдох телевиз ФМ-ийн тоо, нэг хүнд ноогдох хуульчийн тоо, нэг хүнд ноогдох даргынхаа тоогоор дэлхийд тэргүүлдэг гэх юм билээ. Өөр бас юу юугаараа ч тэргүүлдэг юм бүү мэд. Ер нь бол 2 сая гаруйхан хүн амтай орны хувьд бол ахадсан л тоо. Гэхдээ үүнийг шууд буруу гэх нь хаашаа юм. Олон байх тусмаа өрсөлдөөн бий болно. Өрсөлдөөн байгаа бол зах зээлийн механизм зөв ажиллана. Тийм болохоор энэ бүхэнд сэтгэл зовнилгүй хэн хүчтэй, чадалтай, маркетинг менежменттэй, хэн илүү боловсролтой, мэдлэгтэй нь ялаг, дийлэг гээд зөнд нь орхичихмоор. Хамаагүй тэр сүйрлийнхээ жам ёсоор сүйрцгээж шигшигдмэл ганц хоёр нь үлдэг гэхсэн.

Даанч замаас нь, завсраас нь элдэв янзын холион бантан, авлига хахууль, хуйвалдаан хутгалдаж орхино. Ерөнхийдөө бол эдийн засгийн, ардчилалын жам ёсоороо явах ёстой системийг хөндлөнгийн нөлөөллөөр гажуудуулсанаар дээр өгүүлсэнчлэн жинхэнэ сүйрэлд улам л ойртуулж байх шиг. Тусгай зөвшөөрөл, магадлан итгэмжлэл, хэрэглэгчийн найдвартай түнш гэх мэт социализм үнэртсэн механизмаараа жинхэнэ өрсөлдөөнийг төр засаг маань багагүй будлиулж байгааг та бид бэлхнээ мэднэ. Мэдээллийн төөрөгдөл, хомсдолтой хавсарсан гажиг тогтолцоо нь улам бүр даамжирч хүмүүс ч энэ байдалд нь дасан зохицох шинжтэй. Төрийн оролцоо, төрөл бүрийн төсөл тендерүүд шударга бус өрсөлдөөнийг дэвэргэсээр.

Энгийн жишээ: Нэг ийм юм жил бүрийн хавар бодогдоод байдаг юм. Саяхан цагаан сар болов доо. Тавгийн боов хийдэг компаниуд мөн өрсөлөж байна аа. “Манай боов сайн” л гэнэ. “Манайх бүр гэрт хүргэж өгнө” гэнэ. “Тэгвэл бид үнэгүй еэвэн дагуулна шүү” л гэнэ. Зарим нь бүр амталгаанд зориулсан тал боов хүртэл нэмсэн байна. Эцсийн дүнд шинэлэгчдэд хожоотой сайхан. Энэ үед юу бодогддог вэ гэхээр, айл бүрийн тавгийн боовыг төр хариуцвал яах бол гэж. Тендер гэж нэг бөөн будлиан зарлаад хамгийн том авлига өгсөн нэг сайн гар нь шалгарч таарна. Түүнд өрсөлдөгч байхгүй юм чинь боовоо суртчилах, гоё болгох, хөнгөлөлт үзүүлэх хэрэгцээ байхгүй. Айл болгон хүссэн хүсээгүй тэдний боовыг авах юм чинь чанартай хийснээс хэмнэлттэй хийсэн нь дээр болж таарна. Дараа нь өнөө боовыг олох гэж нэг том ажил, засаг даргын цохолтоор нэг хэсэг нь арын хаалгаар арилна. Боовны зохиомол хомсдол үүсч дэлгүүрийн дараалал алийгаа алдана. Энэ зуур хуурамч боов гадуур зарагдаж, цагдаа нар тэдэнтэй тэмцэнгээ дундаас нь өөрийнхөө тавгийн идээг унагах гэж бөөн мундраа гарч таарна. Эцэст нь хар зах дээр боовны дамын үнэ тэнгэрт хадна... Ингэсхийгээд зогссон нь дээр байх. (Б.Ц)

Би юу хэлэх гээд байна вэ гэвэл өрсөлдөөн бол шилдэгүүдээс бусдыг нь сүйрүүлдэг. Харин үүнд хөндлөнгөөс нөлөөлөөд байх юм бол сул доройчууд хэзээ ч сүйрэхгүй. Энэ нь жинхэнэ сүйрлийн гол шалтгаан болдог гэдгийг л хэлэх гэсэн юм..

Бичлэгийнхээ төгсгөлд нь танин мэдэхүйн чанартайгаар сүйрлийн онолын тодорхойлолтыг ШУ-ны үүднээс цухас оруулъя: Сүйрлийн онолын нэр томъёог анх францын математикч Р.Том шинжлэх ухаанд оруулж ирсэн байна. Сүйрлийн онолын гол үндэс нь тасралттай, үсрэлт маягийн өөрчлөлтөөр явагдаж буй үзэгдлийн мөн чанарыг таньж мэдэх загварчлах, прогнозчлох арга зүй юм. Сүйрлийн онол гаргах болсон гол суурь нь динамик системийн төлөв байдлын тухай А.Пуанкарегийн бифуркацын онол, Х.Уйтнигийн гадаргууг хавтгайд буулгах теорем зэрэг шинжлэх ухааны шинэ нээлтүүд болсон юм. Одоо сүйлийн онол нь сүйрэлд хүргэж болох замналыг урьдчилан харж, түүнээс гарах арга замыг эрж хайхад чиглэсэн шинжлэх ухааны шинэ салбар болж хөгжиж байна. Сүйрэл гэдэг нь гадны орчны нөхцөл аажим ерийн байдлаар өөрчилөгдөж байхад тодорхой нэг динамик системийн дотоодод үсрэлт маягийн өөрчилөлт орж аюул, задралын байдалд хүрэхийг хэлнэ.

Эх баригчийн түүх

2009-11-23T21:07:00.000-08:00

Одоогоос олоон жилийн өмнө. Ээж маань давхар биетэй. Сар гарны дараа төрөх ёстой байж л дээ. Яг үнэ үед гай газар доороос гэгчээр аавыг хөдөө орон нутагруу томилолтоор явуулахаар болж. Соци нийгмийн үе болсон хойно эхнэр нь төрөх гэж байсан ч ажил бол ажил л байлаа. Ингээд аав хөдөө тийш хүлгийн жолоо залжээ. За ингээд гэрт ердөө ээж, би, ээжийн гэдсэн дотор байгаа дүү бид 3 үлдлээ. Хоёр ой ч хүрээгүй би тэр үед ээжид хань болно гэж юу байхавдээ. Урдаа тулгар гэдэстээ хүнд улам л хүндрэл учруудаг байсан байлгүй. Гэтэл нэг өдөр (хугацаанаасаа өмнө) ээж өвдөж эхэллээ. Ядаж байхад манайд утас байсангүй. Би дээрээс нь уйлаад л, хоол нэхээд л улам ээжийг сандруулсаар. Эмнэлэгрүү явах боломж байсангүй. Угаасаа оройтсон байлаа. Ингээд ээж маань гэртээ төрчихсөн юм. Дөнгөж төрсөн дороо хүйгээ тасдаж чадахгүй байж. Угаасаа тэнд хөлд ороод удаагүй надаас өөр туслахаар хэн ч байсангүй. Эцэст нь хайч, үнэртэй ус аваад ир гэсэн ээжийн үгийг арайчүү ойлгосон би гэрийнхээ бүх юмыг ухсаар байгаад хамгийн сүүлд нь хайч бас үнэртэй ус аваачиж өгч. Ээж үнэртэй усаар хайчаа ариутгаад хүйгээ тасаллаа.

Ийм л түүхтэйгээр би дүүгээ эх барьж авсан юмдаа. Гэвч хүй таслах хугацаанд хичнээн ч удсан юм бүү мэд, бас дараа нь ээж манайд хүн иртэл бас бүтэн өдөр болсон гэсэн. Тэгээд хамгийн сүүлд цагаан халаадтай эмчийн бараа хараад л ухаан алдсан гэсэн. Их цус алдсанаас болоод ухаан балартаад байсан ч ээж маань хүүхдээ орхиод ухаан алдчихалгүй тэвчсэн юм байналээ. Эх хүний сэтгэлийн хүч гэдэг биемахбодийн хүчээс хэд дахин илүү гэдэг л энэ болов уу. Хожим энэ төрөлтөөс болж ээж бие муутай болсон ч хүүгээ эсэн мэнд аварч чадсанаараа их аз жаргалтай байдаг хүндээ .

Тэр үед хугацаанаасаа өмнө төрж бид бүгдийг сандаргаж байсан дүү маань сая хэдхээн хоногийн өмнө аав болж үрийн зулай үнэрлэсэн баярт мэдээ манайханыг бүгдийг баярлуулаад авлаа.

Амьдрал ч ийм дээрээ сайхан шүү дээ. Саад бэрхшээл амьдралд зөндөө боловч тэр бүрийн цаана заавал аз жаргал байдаг гэдэгт би итгэдэг. Итгэсээр ч байх болно. Амьдралын хүрд өчүүхэн ч зогсолтгүй эргэлдсээр, амьдрал үргэлжилсээр...

Амьдрал өөрөө нэг сая доллар

2009-11-19T01:28:00.000-08:00

Өглөөний сэрүүлэгний дуу намайг сэрээх нь мөнгөний төлөөх дайны дуудлага шиг. Гэрээсээ гараад явлаа. Энд миний сэтгэлгээний ертөнцөөс бүх зүйл нь өөр. Энд хүрээлж буй орчин, эргэн тойрны уур амьсгал, хандлага ер нь бүх юм тэс өөр тийм л ертөнц.
Мөнгөгүй бол би энэ ертөнцөд идэж, ууж, амарч, эрүүл байж, урт насалж чадахгүй. Угаасаа энэ ертөнцийг би бүтээгээгүй. Өөр хэн нэгэн хэдэн мянган жилийн турш бүтээсэн тийм л хорвоо. Энд би бусдын зохиосон дүрмээр л тоглоно. Харин энэ тоглоомны бооцоонд нь залуу насаа тавьчихсан. Энд эргэж ухрах ямар ч боломжгүй. Харин зүгээр л өнгөрсөнөө эргэж харж болно. Угаасаа энд цаг хугацаа хэнд ч, хэзээ ч ухрах боломж өгч байгаагүй. Цаашид ч өгөхгүй биз. (жилийн өмнөх бодол...)

Амьдрал утга учиртай байхдаа сайхаан. Гэр бүлийнхээ төлөө, ирээдүйнхээ төлөө, мөрөөдөлийнхөө төлөө ажиллах, ядрах, зовох эцсийн дүндээ бол жаргал л юм байна. Яагаад гэвэл гэр бүл минь, мөрөөдөл минь бүгд миний амьдралын утга учир нь болохоор нар тусах өглөө бүхнийг би надад өгсөн бэлэг гэж боддог болсон. (жилийн дараах бодол...)

Амьдрал бидэнд асар баялаг боломжуудыг олгодог. Аз бас авъяас нь байвал авч болохгүй зүйл тун цөөхөн хорвоо шүү дээ. Магадгүй маргааш би баяжина. Эсвэл нөгөөдөр. Яагаад гэвэл амьдрал өөрөө нэг сая доллар, аз нь таарвал хоёр сая доллар, авъяас байвал зуун сая доллар, амжилтанд хүрвэл нэг тэрбум доллар шүү дээ.

Амьдрал бол бидэнд өгсөн хамгийн том бэлэг, хамгийн агуу боломж юм. Залуу хүн мөрөөдөлтэй бол зам нь аяндаа гэрэлтдэг юм гэсэн. Хичээгээрэй залуусаа.

What Dreams May Come кино буюу там, диваажин, жинхэнэ хайр гэж юу вэ?

2009-11-12T21:06:00.000-08:00

Надад маш олон зүйлийг бодогдуулсан, одоог хүртэл сэтгэлээс гардаггүй нэг киноны тухай бичихээр шийдлээ. Англиар бол What Dreams May Come гэдэг нэртэй. 1998 оны кино л доо.

Энэ кинон дээр нэг гэр бүлийн бүх гишүүд ойр ойрхон хугацаатай нас барцгаах бөгөөд тэдний гурав нь болох аав, хүү, охин гурав диваажинд, харин ээж нь ганцаараа тамд очдог тухай гардаг юм. Энэ киног анх үзчихээд би там ба диваажингийн талаар өдөржин бодож билээ. Үнэхээр бид бүгдийн түгээмэлээр ойлгодог тэр там, диваажингийн тухай бодлыг маань хүртэл энэ кино өөрчилж чадсан юм.

Кинон дээрээс ойлгосон диваажингийн тухай бодол
Диваажинд ирсэн гэр бүлийн гишүүд тус бүрдээ өөр өөрсдийн диваажинг үүсгэсэн байдаг. Нөхөр нь болохоор эхнэрийнхээ зурсан зургийг диваажингаар төсөөлдөг байсан тул яг л зураг шиг үзэсгэлэнтэй өнгө будаг хоршсон диваажинд ирсэн байв. Харин охин нь өөрийнхөө тоглоомны ертөнцийг хамгийн сайхан гэж боддог тул мөн тийм диваажинд ирсэн байлаа. Гэхдээ охин нь өөрийнхөө жинхэнэ дүр төрхөөр биш харин хамгийн сайхан гэж боддог байсан Ази царайтай онгоцны үйлчлэгчийн дүрээр диваажинд амьдарна. Харин хүү бол аавынхаа сайн найз хар арьст залуугийн дүрээр диваажинд амьдрах бөгөөд үүний шалтгаан нь тэр аавтай үл ойлголцдог байсантай холбоотой. Тиймээс тэр диваажинд аавынхаа хамгийн итгэлт дотны нөхрийн дүрээр амьдрах бөгөөд энэ нь аавтайгаа ойлголцох гэсэн түүний хүслээс үүдсэн бололтой. Нэгэнт өөр өөр дүрээр байх болсон нэг гэрийн гишүүд хоорондоо тааралдах боловч аав нь хүүхдүүдээ таньдаггүй. Диваажинд юу дуртайгаа хийж болно. Дэндүү эрх чөлөөтэй. Хэрвээ хүсвэл зүгээр л газраас хөндийрөөд нисчихэж ч болно.

Гэхдээ диваажинд нэг л юм дутуу. Учир нь хүүхдүүдийн хувьд ээж нь, аавынх нь хувьд амьдралын түшиг тулгуур хань нь диваажинд байхгүй. Эхнэр нь нөхөр хүүхдүүдийнхээ үхэлээс үүдсэн сэтгэл санааны хямралаа дааж чадаагүйн улмаас амиа хорложээ. Мэдээж амиа хорлосон хүн тамд очих нь ойлгомжтой.
Эндээс урган гарсан гол асуулт бол хайртай хүмүүстэйгээ хамт байхгүй бол тэр яг ДИВААЖИН мөн үү. Миний хувьд лав биш. Тиймээс киноны гол дүр маань эхнэрээ тамаас аврахаар өөрийнхөө диваажингийн аз жаргалаар дэнчин тавьж (тэр өөрөө ч тамд үүрд үлдэж магадгүй) тамруу явна. Тиймдээ хайрттайгаа л биш бол диваажин ч там байдгийг энэ кинонд харуулж чадсанаараа жинхэнэ хайрын үнэ цэнийг гаргаж чадсан байх гэж би боддог юм.

Кинон дээрээс ойлгосон тамын тухай бодол
Гол дүр маань тамруу явах замд ёсон жорын зүйлийг үзэж харна. Тэнд бүүр аавтайгаа ч тааралдана. Тамыг үзүүлж буй тухайн дүрслэлүүд бидний төсөөлдөг тамтай ойролцоо. Халуун, харанхуй, бас аймшигтай. Тэр явсаар эцэст нь эхнэрээ олно.

Харин эхнэрийн хувьд там ямар байсан гээч. Тэр зовлон шаналалаа даахаа болиод амиа хорлосон. Уг нь бол амиа хорлосоноор энэ бүх зовлонгоос ангижрах ёстой. Гэтэл тэр амиа хорлосноор түүний зовон улам бүр үргэлжлэнэ. Нэг ёсондоо тэр өөрийгөө үхсэн эсэхээ мэддэггүй зүгээр л зовж шаналаад уйлж унжаад л суугаад байна. Хайртай хүмүүсээсээ хагацсан уй гашуу нь улам бүр хүндэрч үргэлжилсээр л байна. Энэ жинхэнэ там мөн үү. Мөн. Сэтгэлийн тамийн тамын хажууд бие махбодиороо өвдөлтийг мэдрээд шаруулаад, хайруулаад явж байсан нь бараг жаргал гэхэд болно. (Миний л бодол шүү)

Хайж хайж олсон эхнэр нь түүнийг таньдаггүй. Иймээс эхнэрээ ятгаж хамтдаа туулсан бүх сайхан дурсамжуудаа ярьж өгнө. Ярьж өгч буй дурсамжууд дээр нь гайхалтай гэхэд дэндүү гайхалтай хайрын түүхүүд, гэр бүлийн аз жаргалтай дурсамжууд араасаа цуврана. Эцэст нь хайр бүгдийг дийлж нөгөө гэр бүл маань бүгдээрээ халуун ам бүлээрээ диваажинд цугларсанаар кино дуусдаг.

Кино ч яахав дуусдаг юм байж. Харин амьдрал үргэлжилсээр. Киноноос үлдсэн бөөн бөөн бодролууд одоо ч гэсэн толгой дотор хаяа хаяа эргэлддэг л юм. Кинон дээрээс би юу мэдэрсэн гээч. Би тэндээс жинхэнэ хайр, там диваажинг, хүн өөрөө өөрийнхөөрөө байхын сайхныг, хүний хүсэл тэмүүлэл, төсөөлөл, шантаршгүй тэвчээр, зүтгэл бас гэр бүлийн үнэ цэнийг мэдэрсэн.

Миний хэлдэг нэг үг байдагдаа хэхэ. Үзсэн нэг нь дахиж үзээрэй, үзээгүй нэг нь хурдан олж үзээрэй. Кино тухай мэдээллийг эндээс авч болох байх. http://en.wikipedia.org/wiki/What_Dreams_May_Come_(film)

Одоо бас нэг гоё кино удахгүй нээлтээ хийх юм билээ. Lovely Bones гэдэг нэртэй. Заавал үзнэ дээ гээл сууж байна. :P

Хүүхэлдэйн кино гэхэд дэндүү гайхамшигтай бүтээл болжээ

2009-11-03T01:05:00.000-08:00

Саяхан би нэг хөөрхөн хүүхэлдэйн кино үзлээ. Англиар “Paradise Falls” буюу "Up" гэдэг нэртэй. Монголоор “Диваажингийн хүрхрээ” гэж орчуулсан байналээ. Диснейн ээлжит бүтээл л дээ. Өнгөц харахад их өнгөлөг, хөгжилтэй, сонирхолтой хүүхэлдэйн кино мэт боловч цаагуураа бол их зүйлийг өгүүлсэн бололтой. Байгаль хамгаалал, гэр бүлийн үнэ цэнэ, хүсэл мөрөөдөл, амьдралын утга учир, алдар хүндийн хийрхэл гээл зөндөө олон зүйлийг уг кино цөөхөн хэдэн гол дүрээрээ төлөөлүүлж гаргасан байх юм. Хамгийн гол нь энэ бүгдийгээ бүх насныхан үзэхэд тохиромжтой байдлаар хийж бүтээж чаддаг нь Диснейн бүтээлүүдийн гол гайхамшиг гэлтэй.

Киноны хамгийн гоё хэсэг нь гол дүрийн өвгөний маань туулж өнгөрүүлсэн амьдралууд. Энэ хэсэгт бараг яриа байхгүй мөртлөө л сэтгэлд нэгийг бодогдуулам. Танилцаад, хурим хийгээл, байшингаа өөрсдийнхөө гараар янзлаал, дуртайгаараа будаал, эхнэртэйгээ хамт мөрөөдөлийнхөө төлөө мөнгө цуглуулаал (даанч янз бүрийн шалтгаанаар мөнгө үрэх шаардлага гардаг), хүүхэдтэй болох гэсэн боловч...
...энэ бүгдийн эцэст тэд хөгширчихсөн байдаг. Гэвч мөрөөдөлдөө биелүүлээгүй, хүүхэдтэй ч болоогүй. Нэг л өдөр эмгэн нь ертөнцийн мөнх бусыг үзүүлсэнээр өвгөний амьдрал бараг л утгагүй болох бөгөөд уруудах шатандаа ордог. Гэсэн хэдий ч эхнэрийнх нь мөрөөдөл түүний хувьд дэндүү үнэ цэнэтэй хэвээр буюу түүний амьд явах цорын ганц шалтгаан. Энэ л мөрөөдөлөөс энэхүү киноны үйл явдал үргэлжилсээр эцэст нь өвгөнийг өөрчлөгдөхөд хүргэнэ. Мэдээж энэ өөрчлөлтийн шалтгаан нь хүсэл мөрөөдөл ч биш, эд хөрөнгө бүүр ч биш. Тэр бол кинонд орж ирсэн бяцхан бүдүүн жаал.

Амьдрал ч тааж хэлэхэд үнэхээр хэцүү зүйл шүү дээ. Зовлон байдгийн адилаар жаргал ч бас байдаг. Төгсгөл нь гайхамшигтай. Өвгөн хүү 2-ийн цаашдын амьдрал үргэлжилсээр л...

Миний хувьд кинон дээрх хамгийн гунигтай хэсэг нь өвгөний цонхоо арчдаг хэсэг. Уг нь өвгөнийг цонх арчиж байхад цаад талаас эхнэр нь арчиж байдагсан. Гэвч одоо амьдралыг хамт туулсан хань нь нөгөө ертөнцрүү оджээ. Тэр цонхоо ганцаархнаа арчсаар. Аймар гунигтай дүр зураг.

Бас киноны хамгийн сэтгэл догдлуулам мөч нь эхнэрийнхээ адал явдалын дэвтэрт үлдээсэн зургийн цомгийг олж хардаг хэсэг. Өвгөн дэвтэрийг үзэж байхдаа эхнэрийнх мөрөөдөл биелээгүй биш биелсэн, тэр гайхамшигт адал явдалын биелэл нь тэдний хамтдаа туулж өнгөрүүлсэн амьдрал нь юм байна гэдгийг олж мэддэг.

Эцсийн эцэст хүн үхэхдээ эд хөрөнгө биш, эрх мэдэл ч биш зөвхөн сайхан дурсамжаа л авч явдаг юм байна. Хүний цорын ганц хэзээ ч, хэн ч авч чадахгүй өмч бол дурсамж юм байна гэдгийг л энэ киноноос мэдэрсэн дээ.

Хүүхэлдэйн кино гэхэд дэндүү гайхамшигтай агуулгатай бүтээл болсон байналээ. Та бүхэнд зөвлөхөд үзсэн нэг нь дахиж үзээрэй. Үзээгүй нэг нь хурдхан шиг үзээрэй гэж зөвлөмөөр байна. Магадгүй хүн болгон киноноос өөр өөр зүйлийг хардаг байх. Харин миний хувьд бол иймэрхүү л зүйлүүдийг олж харсан бас мэдэрсэндээ.

Энэ киноны албан ёсны вэб хуудас нь бололтой http://adisney.go.com/disneyvideos/animatedfilms/up/ ороод үзээрэй.

Хөгжих тусмаа хүний мөсөө гээдэг болоо юу даа

2009-10-22T02:41:00.000-07:00

Бизнесийн арга ухаан улам бүр гүнзгийрч, бизнесийн санаа оноонууд шөнийн одод шиг гялалзаад л. Бизнес хөгжинөө гэж... Гэхдээ хөгжих тусмаа хүний мөсөө гээдэг болоо юу даа гэмээр юмнууд сонсогдож, зарим нь ч бүүр амьдрал дээр мэдрэгдсээр.

Рекламан дээр бизнесийнхэн бүгд л чанарын тухай ярьцгаадаг. Үнэндээ тэдний хувьд чанар тийм ч чухал зүйл биш гэнэ. Жишээлбэл чанартай сайн машин үйлдвэрлэчихсэн чинь тэр нь эвдэрч өгөхгүй, тэгээд аягүй бол сэлбэг нь зарагдахгүй байх жишээтэй. “- Сайн юм битгий хий, сайхан юм хий. Хэрвээ тэгэхгүй бол бидний үр хүүхэд хоолгүй болно шүү” гэж ярьдаг Хятад хүмүүсийн яриа үнэний ортой бололтой.

Үүрэн холбооны яриа, мессежний тариф улам бүр хямдраад л байх шиг. Багц магцын үйлчилгээ ч гэнэ үү. Бараг үнэгүй болсон ч гэх шиг. Гэтэл бас үгүй бололтой. Бодит байдал дээр яг юу болоод байгааг нь бол та нар мэдэж л байгаа.

Бас нэг жишээ. Хүмүүс яриагаар бол түгээмэл тархсан компьютерийн вирусуудыг антивирусны программ хийдэг компаниуд өөрсдөө гаргадаг л гэх юм. Тэгээд тэр вирусыг нь илрүүлж устгахын тулд тэд нараас тэр программыг нь авахаас өөр аргагүй байдалд ордог бололтой. Бизнесийн арга гэхэд арай муухай л юм.

За тэр компьютерийн вирус ч яахав. Тэгтэл хүний эрүүл мэндээр тэгж тоглодог бизнесийн арга байдаг гэж байх юм. Саяхан зурагтаар үзлээ л дээ. Харшилыг арилгана, мөөгөнцөр устгана өөр юу юу ч гэдэг билээ тэр эмнүүд чинь зөвхөн тодорхой хугацаанд л өвчнийг арилгадаг гэнэ. 3 сар ч юм уу. Тэгээд хэсэг хугацааны дараа дахиад гарч ирээд нөгөө эмээ л авч уухгүй бол алга болдоггүй юм байх. Ингээд тухайн хүнийг байнгын эмний хэрэглээтэй болгодог гэнээ. Аймар байгаа биз.

Зарим нэг хувийн шүдний эмнэлгүүд зүгээр шахуу байхад “сувгийг нь бөглөнө, ухна, хатаана, цоолно, цэвэрлэнэ” гэх мэтээр дахин дахин явуулаад, очих тоолонд мөнгө аваад байдаг биздээ. Энэ чинь бас л бизнесийн арга гэж байгаа юм даа. Муухай л байна. За тэр машин техник, компьютер энээ тэрээ ч яахуу. Харин хүний эрүүл мэндээр тоглох л муухай байна даа.

3 төгрөг, 4 төгрөг, бас 100 сая доллар

2009-10-01T08:45:00.000-07:00

Эмээг залуу байхад юм гэнэ лээ. Эмээ нэг удаа 4 төгрөгний өрөнд орж л дээ.Тэгээд өрөө төлөх гэтэл бэлэн мөнгөгүйгээс болж оронд нь 1 ямаа өгч байсан гэсэн. Тэр үед ямааны ханш 4 төгрөг хавьцаа байсан юм байхдаа.

Аав дөнгөж сургуулиа төгсөж ирээд хотод таних айлгүй, идэх ч хоолгүй гудамжаар алхаж яваад 3 төгрөг олж байсан гэсэн. Тэгээд ёстой тансаглаж өгсөн гэсэн дээ. Тэр үеийн 3 төгрөг одооны хэдэн төгрөгтэй тэнцэх юм бол?

Дүү бид нарыг бага байхад ээж бутархай зоосон мөнгүүдийг цуглуулж чихэр шиг болгож боогоод орхиод явдаг байсансан. Чихэр шиг боодол бүр нь нэг зайрмагний үнэ байсан гэсэн. Худалдагч эгчид өгөхөд өөдөөс яг нэг зайрмаг өгдөг байсан юм. Тэр үед зайрмаг яг хэдэн төгрөг байсан, бас ээж яг хэдэн төгрөг эсвэл мөнгө үлдээдэг байсныг санадаггүй ээ.

90 онд юмдаг. Би автобусаар хичээлдээ явж байлаа. Тэгтэл хажууд сууж байсан ах эгч 2 автобусны мөнгөө төлсөнгүй гээд кондуктор эгчид загнуулаад хөөгдөж бууж байж билээ. Тэр үед автобусанд том хүн 1 төгрөгөөр явдаг байсан санагдаж байна.

Би нэг удаа сургууль дээрээ сахилгагүйтэж байгаад цонх хагалаад 50 төгрөгний өрөнд орж билээ. Миний хувьд том цохилт болсон. Яаж ээж аавд хэлнээ гэхээс яс хавтайж байлаа. Азаар ээж, аав нэг их загнаагүй юмдаг.

5 төгрөг барьж очоод дэлгүүрээс 2 талх авчихдаг байлаа. Энэ бол 92 он.

Одооны Сөүл хуучнаар бол Туяа рестораны хоолны үнийг хараад ухаан алдах шахаж билээ. Тэнд нэг хоол 200 гаран төгрөг байсан. Уг нь тэр үед 6, 7 төгрөгөөр нэг хуушуур авч иддэг байсан юм.

Нэг удаа бид нар гэр бүлээрээ өдөржин парк дээр тоглосон юм. Бараг бүх тоглоомон дээр л тоглосон байхаа. Орой ээж ааваас асууж байна: - өнөөдөр хэдэн төгрөгөөр тоглов. Аав хариуд нь хэлж байна: - ердөө л 300-хан төгрөг.

Оюутан боллоо. 1-р курсдээ халаасандаа 500 төгрөгтэй явж байвал ангийнхаа “бурзгар” нь болдог байлаа. Харин 4-р курсдээ хонхны баярынхаа нийллэгэнд 100 000 төгрөг гаргаж байсан. Тухайн үедээ их мөнгөөр нийллээ гэж шүүмжлүүлж байсан юм.

2003 он. Би төрийн албанд ТҮ9 зэрэглэлээр цалинждаг байлаа. Цалин маань 43600 төгрөг байв. Гэхдээ бааранд ороод Боргиог 700 төгрөгөөр уучихдаг байсан юм. Гацуурхан ороод 450 төгрөгөөр хагас гуляш, 300 –гаар хагас шөл аваад идчихнэ. Нэг ёсондоо 750 төгрөгөнд 1, 2-р хоол идчихэж байгаа юм. Харин гэрлүүгээ бол алхчихна.

Ажил өөрчлөгдөж цалин нэмэгдэв. Энэ үед би эмээгийн ханшаар бол 150 мянган ямаа, аавын ханшаар бол 200 мянган өдөр тансаглах мөнгийг зөвхөн 1 сарын цалингаараа авдаг боллоо. Гэвч надад чамлалттай санагдаж байсныг нуух юун. Учир нь энэ үед толгойд эхнэртэй болох бодол эргэлдэж байлаа. Тэр үеээс би мөнгийг хэрхэн ахиухан олох талаар бодож эхэлсэн юм.

9-ийн тос, 24-ийн чихэрийн үнэ 4 оронтой тоогоор хэмжигдэж, урд нь анзаардаггүй байсан газрын төлөө хүмүүс нэгийгээ луйвардаж, үнэгүй хувьчилж байсан орон сууцаа ч хүртэл барьцаат зээлээр авдаг болжээ. Хэн нэгэн хүн 100-хан төгрөгний төлөө гутал тослож байхад өөр нэг хүн 100 сая төгрөгөөр мөрийтэй тоглоол. Монгол улс уул уурхайн гэрээний урьдчилгаа 100 сая долларын төлөө толгойгоо гашилгаж байхад, Харри Поттер кино гарсан өдөртөө л 100 сая долларын орлого хийгээл. Хэмжиж боломгүй хэмжээнүүд. Энэ бол 2009 он.

Цэцээ гүн оргил ба блогчин залуус

2009-09-28T23:25:00.000-07:00

За өнгөрөгч амрлатын өдрөөр бидний хэдэн блогчид санаа нэгдэн Богдхан уулынхаа ноён оргил Цэцээ гүнийг зорьсон юм. Мэдээж аялал маань амжилттай, бас хөгжилтэй байлаа. Ингээд аялалынхаа зургуудаас толилуулж байна.

За энэ чиглүүлэгч шугамыг дагаал яваад байлаа шүү дээ.

Аялалын багийнхан. Дээрээс нь зураг авагч оролцуулаад. Эхнээсээ л цоглог байсандаа бид хэд.

Аялал эхэндээ хэцүү байсан шүү. Амьсгаадаад явж болдоггүй. Хөдөлгөөний дутагдал бололтой. Цоомоо ч чиглүүлэгчийн үүргээ сайн биелүүлээд урд нь гараал алхаад байсан. Цоомоод чирэгдээд явсан гэхэд бараг болно.

Намрын шаргал ой дундуур алхагчид. Зураг дээр оройн дээд их багш Остоор тэргүүтэй цувааны цоожлогчид харагдаж байна.

Хамгийн эхний амрах газар. Авч явсан хүнсээ идэцгээж байна.

Энэ зураг бол юм идэж гэдэс гарсан хүмүүс нэг нэгнийгээ таницгааж байгаа нь гэдэг зураг.

За аялалын багийнхан амарцгааж байна. Остоор багшийн билгүүн номт яриаг сонсоол бид чинь баясан суулаа шүү дээ.

Шилмүүст ой дундах жим. Дагаад алхаад л байлаа алхаад л байлаа...

За энэ бараг орой дээр гарч ирж байгаа үеийн зураг. Их л ядарцгаасан байсан боловч ...

Энэ мундаг уулчин залуу болбасу би болой

Амрах агшин. Мэдээж яаж зургаа авхуулхаа мартхав.

Цэцээ гүний орой дээр модод иймэрхүү л харагдаж байналээ. Яг шинэ жилийн гацуур шиг. Маш үзэсгэлэнтэй байгаа биз.

Цэцээ гүн оргил маань далайн түвшнөөс дээш 2258 метр юм байна лээ шүү. Ийм өндөрт гарна гэдэг уулын спортын 3-р зэрэг л гэсэн үг.

За оргилын овоотой хэсэг нь. Авч явсан сүүгээ өргөж, арцаа уугиулсандаа бид хэд.

Оргил дээрээс тэнгэр ойрхон юм билээ. Нэг иймэрхүү л харагдана даа.

Аян замын хоол хүнсээ гэж. Оргил дээрээ гарчихсан хүмүүс чинь одоо үдийн цайгаа уугаал, уулын Төмөр царайлаал суудгийн байгааздээ :P

Буцаж явах замын зураг. Бид хэд яахав угаасаа сураагүй юм биш нэгнийгээ явуулж, шинэ онигоо зохиогоол сууж байгаа нь.

Бууж явахад нэг иймэрхүү харагддаг юм билээ. Сайхан байгаа биздээ.

За энэ бол Манзушир дээрээс авсан зураг. Цаана чинь намар болчижээ. Шаргал ойн өвөрт хичнээн дулаахан гэж санана. Төгсгөлд нь хэлэхэд аялал тун сайхан болсон. Маш хөгжилтэй, маш коллективтэй, маш сайхан эхлэл өрнөл төгсгөлтэй аялал болсон. Мөн аялалд явсан өдөр маань ч ёстой сайхан өдөр байсандаа. За ингээд бид хэд нэг өдрийг эрүүл агаарт аялж, иймэрхүү байдлаар өнгөрөөсөндөө.

Дерсу Узала ба хүн байгалийн хүйн холбоо

2009-09-27T00:22:00.000-07:00

Өнгөрсөн долоо хоногт ТВ9 телевизээр “Дерсу Узала” хэмээх хуучны нэгэн кино гарлаа. Бага байхдаа би нилээд хэд үзэж байсан боловч өнгөрсөн долоо хоногт үзсэн шиг сэтгэлдээ гүн хүлээж авч байгаагүй юм. Кино надад маш гайхалтай мэдрэмж төрүүлж, дотор минь элдэв зүйлийг бодогдуулсан болохоор киноны тухай бичихээр шийдлээ.

Киноны өгүүлэмжийн талаар: Зовлон жаргалын гэрч болсон атираа бүхий нар салхинд гандсан бор царай, майга хөл, ноорхойдуу хувцас, намхавтар биетэй ази царайтай хүн. Энэ бол Дэрсү Узалагийн дүр төрх, гаднах байдал. Хэдийгээр түүний дүрслэл эгэл боргил авч дотоод сэтгэл нь булгийн ус шиг тунгалаг, бас эхийн сүү шиг цагаан гэдэг нь киноны явцад улам бүр харагдаж байлаа.

Сайхан сэтгэлт хөгшин эр Дерсу Узала, зоригт аялагчид, ухаалаг бас ноён нуруутай ахмад, зожигрон тэнүүчлэх Хятад өвгөн бүгд л тус бүрдээ дэндүү мэдрэмжтэй дүрүүд. Дерсу юуны учир ойд тэнүүчлэх болсон, бас согтохоороо бусдаас зайдуу ганцаархнаа суучихаад дуулдаг дуу нь яагаад тийм гунигтай юм байдаг бол... Тэр яагаад Хятад өвгөний зовлонг дэндүү сайн ойлгодог юм бол... Дерсу тэр барыг буудчихаад яагаад тэгтэлээ өөрчлөгдсөн юм бол... Асуулт амьдрал дээр бий болж, харин кинон дээр хариулагдсаар...

Аливаа зүйлийн харагдах байдал болон дотоод ертөнц хоёр хоорондоо маш их өөр байж болох жишээг киноны найруулагч бидэнд Дерсугийн дүрээр, мөн Уссурын бараар төлөөлүүлж харуулсан бололтой. Түүнчлэн уг кино сэтгэлгээний маш нарийн асуудлыг хөндөж тавихын зэрэгцээ Сибирийн ой тайга, ан амьтан, догшин урсгалтай уулын голууд гэх мэт байгалийн дүр зургуудыг хальснаа үнэхээр мэдрэмжтэй буулгажээ.

Цаанаа л нэг дотно гол дүрийн маань үг яриа, үйл хэрэг нь кино явцад бидэнд хүн байгаль хоёрын харилцан шүтэлцээний талаар улам бүр ойлгуулж байх шиг. Гэвч хүмүүс бид тэр нарийн шүтэлцээ, байгаль эхтэйгээ холбогдсон тэр сэжмийн талаар даанч дэндүү нимгэн мэдлэгтэй ажээ. Тиймдээ ч хорвоо дэлхий өдрөөс өдөрт өнгөө алдаж, үр хүүхэд болсон хүмүүс биднээсээ улам бүр холдсоор байгаа бизээ.
Эцэст нь дүгнэхэд хүн гэж яг юу юм бэ? Хүмүүс бид байгалийн бүтээл үү эсвэл нийгмийнх үү? энэ л асуултын хариуг би “Дерсу Узала” киноноос олж харж дотоод сэтгэлдээ бага ч болов эрэгцүүлэл хийсэн минь энэ киног үзсэний гол үнэ цэнэ юм уу даа.
Зохиолын тухай болон дүрүүдийн жинхэнэ эздийн талаар: “Дерсу Узала”-г кино болохоос өмнө “Дерсу Узала” хэмээх зохиолыг Оросын нэрт газарзүйч, судлаач, ахмад В.К.Арсеньев бичжээ. Тухайн үед Сибирийн ой хөвчийг байрзүйн зурагт оруулах их ажил хийгдэж байсан бөгөөд “Дерсу Узала” кинон дээр гардагчлан ахмад Владимир Арсеньев өөрийн цэргүүдтэйгээ судалгааны экспедицээр явж байхдаа Дерсу Узала хэмээх нутгийн өвгөнтэй тааралдаж газарчлуулж явсан байна. Судалгааны багийнхны аялах явцад тохиолдсон адал явдал, Дерсу өвгөний үзэл баримтлалаас үүдсэн энэхүү кино болон зохиол нь бодит үйл явдал дээр тулгуурласан бөгөөд зохиолын гол дүр Дерсу, ахмад нар бодит дүр юм. Хожмоо уг зохиолыг нэрт найруулагч А.Күросава, Юрий Нагибин нар кино зохиол болгож өөрчилснөөр энэ кино бүтээгдсэн байна. “Дерсу Узала” гэдэг энэ үг одоо ч Оросод алдартай. Түүний нэрээр нэрлэгдсэн жуулчны бааз, амралтын газар, кафе, аялагчдын клуб хүртэл Оросод бий. Зүүн гар талын зураг дээр ахмад Арсеньевийн гар бичмэл, баруун гар талын зураг дээр жинхэнэ Дерсу ба Ахмад Арсеньев нар байна.

Кино болон найруулагчийн талаар: Уг кинон дээр голдуу орос хүмүүс гардаг болохоор нь би хуучны ЗСБНХУ-ын л кино юм байх гэж бодож байсан минь эндүүрэл байж. Тус кино нь Японы нэрт найруулагч Акира Күросавагийн бүтээл бөгөөд Зөвлөлт холбоот улстай хамтран 1975 онд хийсэн кино аж. Энэ кино маань Күросава найруулагчийн гадаад хэл дээр хийсэн цорын ганц бүтээл бөгөөд “гадаад хэл дээрх шилдэг кино” номинациар Оскарын шагнал авсан юм. Зүүн гар талын зураг дээр кинон дээрх Дерсү болон ахмад түүний багийнхан харин баруун гар талын зураг дээр нэрт найруулагч Акира Күросава зургууд тус тус байна.

Намрын дүр зураг хийгээд ретро мэдрэмж

2009-09-22T22:38:00.001-07:00

Нэг л хэмээр үргэлжлэх шаргал өдрүүд, илч муутай бүүдгэр нар, хаяа хаяа зөөлөн орох хүйтэн бороо, гудамж талбайд хаа сайгүй хөглөрөх хатсан навчис, ажил хэрэгч уур амьсгалтай ч цаанаа л нэг дүнсгэр намар цаг.

Жиндүү салхи үе үе үлээж умардын жаврыг туун ирэх нь өвөл цаг хэзээ мөдгүй ирэхийг сануулна. Тэртээд шаргалтах Богдхаан уул. Нэг нэгнээ халхалсан байшин барилгууд. Маргаашын төлөө өнөөдрийг золиослон, ирээдүйн тийш дэндүү ихээр яаран алхах зав чөлөөгүй хүмүүс.

Намар цагийн дүр зураг миний хувьд нэг иймэрхүү...

Саяхан ажлын өрөөний ширээгээ ухаж байсан чинь өөрийнхөө хуучин тэмдэглэлийн дэвтрийг олоод. Тэмдэглэл гэхээсээ илүү хагас хугас шүлгээр дүүрсэн цоохор цаас. Эргүүлж тойруулж жаахан суутал нэлээн дээр бичиж байсан бололтой хуучны хэдэн мартагдсан мөр шүлгээ оллоо. Шүлэг бүхэн тухайн цаг үеийн мэдрэмж байдагдаа. Энэ хэдхээн мөрийг би юуны учир яагаад бичиж байснаа ч мартчихаж. Ямар ч л гэсэн гунигаар цалгисан намар цагийн мөртүүд бололтой. Доор сийрүүлвээс:

Ажлын өрөөний цонхоор

Амьдрал дэндүү өнгөгүй

Аль эрт мартагдсан уйт намрын мэдрэмжүүд л

Аяар аяархан сэтгэлд хөврөнө

Өөр юу ч үгүй

Надад одоо юу байна гээч

Нар тусдаггүй цонхны тавцан дээр

Насаа элээсэн гунигт цэцэг шиг

Мэдрэмж байна.

Үсэг холбож, үгээр илэрхийлсэн мэдрэмж юмуу даа энэ хэдэн мөрүүд. Бүх шүлэг л бараг хуучны мэдрэмж минь болдог байх. Унших бүрт л тэр цагийн үеийн зовлон, жаргал, баяр гунигийг сануулна. Ойрд яагаад ч юм бүх юм ретро. Зурагтаар бас л хуучны кино, аманд 10-аад жилийн өмнөх дуунуудын ая аялагдаад. Цаанаа л нэг бүх юм ретро. Мэдрэмж хүртэл хэдэн жилийн өмнөх шиг.

Миний найзын найзын найзынх нь найз нь би

2009-09-20T08:53:00.000-07:00

Би олон найзтай хүн. Энэ бол яах аргагүй бахархах зүйл мөн гэж би боддог. Гэхдээ тэр олон найзууд маань намайг харин найзаа гэж боддог болов уу.

За ямартай ч би хувьдаа хэнийг найзаа гэж бодмоор байна тэр бүгд миний найз мөнөөсөө мөн. Би хэн нэгний хувьд найз биш сайн танил ч байж болно гэхдээ миний хувьд бол найз гэж бодсон хүн маань яах аргагүй найз мөн болж таарч байна. За тэгээд өөрийнхөөрөө бодохоор би их олоон найзтай хүн болж байгаа юм.

Магадгүй би сайн танил, найз 2-оо ялгаж салгаж чадахгүй андуурсан ч байж болох талтай. Гэхдээ яахав дээ найзад дуртай л хүн байгаа биз.

Жинхэнэ найз олдохоо байждээ гэж зарим хүмүүс ярьдаг. Үнэндээ жинхэнэ найзаасаа хэтэрхий их юм хүсэж хүлээсэн, найз гэдэг нэрээрээ түрий барьж нөгөөдөө ачирхаж, бачирхдаг зангаас болж жинхэнэ нөхөрлөл тэр болгон үүсдэггүй байх л даа. “Чамайг ингэвэл би тэгнэ” гэх мэт хариу нэхсэн нөхөрлөлөөс жинхэнэ нөхөрлөл хэзээ ч үүсэхгүй нь тодорхой. Заримдаа бас “Чи миний найз л юм бол тэг ингэ” гэх мэт үгийг найзууд бие биедээ хэлдэг шүү дээ. Уг нь тэр хүн таны найз гэдгээрээ өөрийн тань өмнө үүрэг хариуцлага хүлээх ёсгүй л баймаар. Хамгийн гол нь найз гэдэг зүйлийнхээ утга учрыг ойлгох нь чухал. Найз бол зөвхөн сэтгэлийн нарийн чанд хэлхээ болохоос “найз” хэмээх нэрээр далайлган ажлаа амжуулж, амьдралаа дээшлүүлэх гишгүүр биш гэдгийг хүмүүс тэр болгон мэддэггүй байх л даа.

Цаг хугацаа найзуудыг шигшиж жинхэнэ найзуудыг тунгаадаг бизээ. Жинхэнэ найзуудын нөхөрлөл цаг хугацааг үл хамааран уртаас урт үргэлжилдэг юм билээ. 50 гаруй жил нөхөрлөж буй аавынхаа найзуудаас би жинхэнэ нөхөрлөл цаг хугацааны уртад зэвэрдэггүй, гандадгүй юм байнаа гэдгийг ойлгож авсан. Надад ч бас тийм нөхөрлөл олон байгаасай ...

Саяхан миний толгойд нэг сонин бодол орж ирээд. Хэрвээ энэ хорвоод байдаг бүх хүн найзтай бол энэ дэлхийн бүх хүн найзын сүлжээгээр хоорондоо холбогддог байх. Миний найзууд цаашаа бас зөндөө найзтай, тэр найзуудынх нь найзууд ч бас найзтай гэх мэтээр найз нөхдийн сүлжээ үргэлжилдэг байх. Магадгүй миний найзын найзын найзынх нь найз нь эргээд би ч байх юм билүү хэн мэдлээ. Ямартай ч миний бодлоор хорвоо дэлхийг бүрхэж чаддаг хамгийн том сүлжээ бол найзын сүлжээ.

Орчлонг танин мэдэх аяныг хамтдаа эхлүүлсэн багын найз, эрдмийн өргөөнд тохой нийлүүлэн суусан ангийн найз, амьдралын уртад мөр зэрэгцэн урагшлах ажлын найз гэх мэт олон олон найзууд надад байдаг.

Мөн сүүлийн үед миний оронзайд маш хурдан бас хүчтэй түрэн орж ирсэн найзууд бол блогчин найзууд маань. Үргэлж дотно дулаахан эерэг энерги үүсгэж, үзэл бодлоо чөлөөтэй хуваалцдаг, хамгийн гол нь байнгын идэвхтэй байдаг нь тэдэнтэй найзлах хамгийн том шалтгаан минь болдог. Өдөр болгон биш гэхэд долоо хоногтоо нэг уулзаад инээж, ханиагаад суух ч бас нэг төрлийн жаргал юм даа. Тэр л сайхан үеийн мэдрэмжинд сэтгэл хөдлөөд “би найзтай хүн” бахархан дуу алдмаар санагддагаа нуух юун. За тэгээд найзууддаа “найзуудын өдрийн” мэндийг хүргэе дээ.

Шинэ сайтын тухай

2009-09-13T21:42:00.000-07:00

Шинэ долоо хоногийн мэнд. Сайхан амарсаны маргааш, сайхан ажиллах ч бас сайхан шүү тээ. Сайхаан сайхан.

Энэ удаад та бүхэнд хэрэг болохуйц вэб сайт танилцуулах гээд. Энэ сайтаар зочилж үзээгүй нь хажуугийн сурталчилгаан дээр дараад нэг үзчихээрэй. Сайтын тухайд гэвэл цоо шинэ сайт бол биш. Өмнө нэг жил гаран ажилласан юм. Өмнөх хувилбарыг нь блогчин Цуки-Яма, Майгазартай хамтран хийж байсан юм. Овоо ч олон хандалттай болсон. Саяхан хостны хугацаа дууссантай холбоотойгоор сайтаа бүрэн өөрчилж шинэчиллээ. Та бүхэн тэгээд газартай холбоотой хүссэн мэдээ, материал, заавар зөвлөмж, бас бус ойлголтуудыг эндээс авна биз. Цаагуур чинь зурагт радиогоор нэг “иргэн бүр газар өмчилж авах боломжтой” гээд яриад байгаа биздээ. Тэгхээр та бүхэнд ч бас тийм эрх байгаа. Энэнтэй холбоотой түгээмэл асуулт хариултуудыг ЭНД дараад авч болно. Энэ мэт зүйлүүдийг манай сайтаас аваарай. Агуулгын хувьд бас байнга шинэчлэгдэж, улам бүр баяжиж байх болно.

Та бүхэн бас хэрэгтэй хүмүүст нь манай сайтын УРЛ-ыг дамжуулж өгөөрэй. Дэм дэмэндээ дээс эрчимдээ. Эрчим нь тэгээд өөр юундаа байдаг юм. Сайтын тухай дэлгэрэнгүй мэдээллийг ЭНД дарж уншаарай. Бас зүгээрчгүй сайтынхаа хүрээнд ТВ нэвтрүүлэг хүртэл хийгээд авсан шүү. Даанч санхүүжилтгүйн улмаас зогсчихсон болхоос.Нээрээ манай сайтыг Мозилла дээрээс үзвэл гоё харагддаг юм байналээ.

За та бүхний шинэ долоо хоногийн ажил үйлсэд амжилт хүсэе.

Намар болсоны л шинж биз. Нэг ийм бичлэг биччихлээ

2009-09-07T00:12:00.000-07:00

Хорвоо дээр хоног өдрүүд урссаар... Нэг өдөр зовох цаг байхад нөгөө өдөр жаргах цаг заавал байдаг гэж би боддог юм. Заримдаа бүх юм утгагүй санагдаад үхэж далд ормоор үе ч тохиолдоно. Заримдаа амьдрал чи юунд ийм сайхан юм бэ гээд дуу алдам өдрүүд ч бас байна. Тиймдээ ч амьдрал гээчийн утга учир оршдог биз дээ.

Хэдэн жилийн өмнө үхэл гэдэг их л амархан санагддаг байлаа. Ер нь л үхэл ч гэлтгүй аливаа юмыг хүчлэн шийдэх гэж зүтгэдэг их омголон байж. Одоо бол үр хүүхэдтэй мань мэт шиг хүн үхнэ гэж ярих нь битгий хэл “ү” үсгээр эхэлсэн юм ч ярих амны алдас биз.

Хаа нэгтээгээс уншиж байсан юм байна. Эсвэл нэг блогоос ч байж магад. Нэг хүн нэг номыг 3 удаа уншиж л дээ. Эхлээд 17 настайдаа дараа нь 30 гараад сүүлд нь хөгширсөн хойноо. Унших бүрт тэр номоос өөр өөр ойлгоц, бодрол авсан гэдэг. Гэтэл ном яг анхны бичсэн хэвээрээ. Хавтас нь элэгдсэнээс агуулгын хувьд өөрчлөгдсөнгүй. Харин номыг уншсан хүний цаг хугацааны туршид хуримтлуулсан өөрийн үзэл бодол, туулсан жаргал зовлон л тэр номыг өөр өөр хүлээн авахад хүргэсэн байна.

Үнэндээ тэр ном, амьдрал 2 яг адилхан. Байж л байна. Бас үл өөрчлөгдөнө. Харин хүмүүс бид л биенийгээ өөрчилсөөр. Үр дүнд нь амьдралыг бид өөр өөрөөр хардаг. Мөнгөтэй хүн амьдралыг нэг өөрөөр харна, ядуу хүн бас нэг өөрөөр, хүүхэд өөр талаас нь, хөгшид бүүр өөр өнцгөөс, ганц бие хүмүүс, хосууд, үр хүүхэдтэй хүн, дарга хүн, цэрэг хүн, харамч хүн, атаархуу хүн, тусч хүн, шогч хүн бүгд л өөр өөрсдийн байр суурь, үзэл бодолоор амьдралыг хардаг, тэр ч үүднээсээ амьдралд тэгж ханддаг. Магадгүй ийм олон янзаар хүмүүс амьдралыг хардаг болхоор өөр хоорондоо зөрчилддөг биз ээ. Хорвоо дээр хүмүүс бие биенээ хайрлаж, үзэн ядаж, хүндэлж, найзалж, дайсагнаж эсвэл зүгээр мөр мөрөө хөөгөөл амьдарсаар... Амьдрал үргэлжилсээр...

Цаг хугацаа урсан өнгөрч, хором мөч бүрээрээ хорвоог таниулдаг энэ их амьдралын урсгал дунд би ч бас бага багаар ухаажсаар, ухаарсаар л явна даа.